amalinks wokungena

Breaking News

'Uzulu weZimbabwe Kumele Aphatheke Kumzabalazo Wokulwisana Lenkohlakalo'


Uzulu weZimbabwe sekhuthazwe ukuthi aphatheke kumzabalazo wokulwisana lenkohlakalo kulandela uphenyo oluveze ukuthi kulemisebenzi yokungethembeki engaba isenzakala ekusebenzeni kukasomabhizimusi olodumo uMnu Kudakwashe Tagwirei lohulumende.

Inkuthazo le iphume ngoLwesibili emhlanganweni obuhlaziya udaba lwenkohlakalo ongenwe ngabantu abedlula inkulungwane ebulenjini be-internet njalo oqhutshelwe enkundleni yeTwitter ulawulwa yintathelizindaba uHopewell Chin’ono.

Isisusa salumhlangano luphenyo olwenziwe yinhlanganiso yeMelika eyeThe Sentry, yona ethi uTagwirei engaba ephethe uhulumende esidukwini (State capture) njalo ulawula ingatsha zomnotho ezinengi.

Impumela yaloluphenyo ikhomba ukuba uTagwirei ulabantu adlelana labo ebhanga elikhulu lelizwe eleReserve Bank of Zimbabwe, okwenza ukuthi athole imali yakwamanye amazwe kulelibhanga santando.

Kodwa usibalukhulu walelibhanga uMnu John Mangudya usekulandule lokhu kumsakazo weStudio 7.

Abakhulume emhlanganweni lo bagoqela isiphathamandla seThe Sentry uMnu Peter Robinson, yena othe amabutho eZimbabwe akhanya esegxilile kundaba zomnotho ikakhulu kugatsha lwezokwemba esebenzelana loTagwirei.

URobinson uthe le yinto embi emele imiswe njalo amabutho engaze aphatheka kundaba omnotho. Ukhuthaze uzulu ukuthi aphatheke ekulwisaneni lenkohlakalo.

Amazwi akhe agcizelelwe ngumlobi weZimbabwe, laye obeyisikhulumi uNkosikazi Tsitsi Dangarembwa yena othe ngaphandle kokuthi uzulu abe lesibindi, inkohlakalo izaqhubeka ibulala ilizwe.

please wait

No media source currently available

0:00 0:04:18 0:00

UTagwirei ubengadobhoi ucongo lwakhe kanti lombiko esimthumele wona kakawuphenduli. Isikhulumeli sikahulumende uNkosikazi Monica Mutsvangwa laye ubengadobhi ucingo lwakhe ngaloludaba.

Facebook Forum

XS
SM
MD
LG