Ngesikhathi eleMelika liphakathi kokhetho lokudinga umongameli omutsha kumbe njalo ukubuyisela ovele ekhona, uzulu we Zimbabwe uthi kunengi okungafundwa endabeni zokhetho ukuze luqhutshwe ngcono elizweni. Kodwa uhulumende yena uthi akula okungafundwa yiZimbabwe mayelana lalolukhetho.
Ingcitshi ezicubungula ezombusazwe zithi ele Zimbabwe lelizifundo ezinengi elingazithola ngokhetho lweMelika.
Ingcitshi kwezombusazwe uMnu Costa Nkomo uthi into enkulu engafundwa yiZimbabwe yikungabi khona kodlakela ngezikhathi zokhetho.
“Kulezinto ezinengi esingazifunda. Engikufundileyo yikuba bekulokutha. Lokhu kutshiyene kakhulu lalokho esikubona eZimbabwe lapho esibona khona abantu betshaywa”
Uqhubeke esithi abanengi e Zimbabwe abalandela ukhetho lolu bafisa ukuba umkhokheli wama Democrats uMnu Joe Biden anqobe.
“Inengi ukubona kwami yikuba abanengi balesifiso sokuba okhokhela ibandla lama Democrats uMnu Joe Biden nguye ozanqoba kulolukhetho”
Ukhetho lwe Melika lwenziwa ngesikhathi uhulumende we Zimbabwe ezama ngazo zonke indlela ukulondoloza ubudlelwano obuhle lamanye amazwe womhlaba.
Umsekeli kamgcinisihlalo obona ngemisebenzi kubandla le ZANU PF uMnu Mabutho Moyo uthi uzulu we Zimbabwe kakumelanga azihluphe ngokwenzakala kwele Melika ngoba kungelani laye.
“Thina njengabantu be Zimbabwe asiphatheki kangako kumpumelo yokhetho lwe Melika nxa bengaguqulanga ukuba badlelana njani leli Zimbabwe. Sekuguqulwe oMongameli abathathu selokhe kwafakwa izijezio zomnotho”
Lanxa usuku lokhetho lokudinga umongameli kweleMelika labekwa lingelakusasa, mhla ka 3 Lwezi, ezigabeni ezinengi zelizwe abantu abeangaba yizigidi eziphose zifike ikhulu, sebevotile kuhlelo lokuthumela ngeposo lolwe early voting. Zindala zombili phakathi kukaMongameli Donald Trump okhona manje webandla lama Republicans lo Mnu Joe Biden omela ibandla lama Democrats.
Lobanje kulabalihlekana abakhona ephepheni lokuvota kodwa kuphakathi kukaTrump loBiden okukhangelelwe ukutholakala umongameli omutsha weMelika. Okungaba yikubuyisela uTrump ukuthi abuse okweminye iminyaka emine loba ukukhetha owake waba ngumsekeli kamongameli uBiden.