amalinks wokungena

Breaking News

Uzulu weZimbabwe Uxwayiswa Ukuqhubeka Elandela Iziqondiso zeWHO Zokumelana leCovid 19


Coronavirus
Coronavirus

Abezempilakahla baxwayisa uzulu ukuba makangayekethisi ekulandeleni iziqondiso ezabekwa nguhulumende elandela ezenhlanganiso ebona ngezempilakahle emhlabeni jikelele eyeWorld Health Organisation ezokumelana lokusabalala kweCOVID-19 njengoba lokhe ungakatholakali umuthi wokwelapha lesi sifo.

Lesi sixwayiso siza ngesikhathi lilokhe liqansa inani labatholakala belegcikwane leCovid 19, eZimbabwe ikakhulu kulabo abangelayo imbali yokukwethekelela kwamanye amazwe.

Ingcwethi kwezempilakahle, uDr Garry Shava uthi kumqoka ukuthi uzulu aqhubeke elandela iziqondiso zokuzivikela ezigoqela ukugqoka ama mask, ukugeza izandla sikhathi sonke lokungathintani mahlayana labanye, i-social distancing.

“Inkuthazo engingaba layo ngeyekuthi khona silandele izimiso eziyabe zifakiwe ezokuthi umuntu kumele athi i social distance. Nxa ubona ingani usulawo lumkhuhlane akumelanga ube ubhodabhoda phandle kodwa kumele uhlale phansi ubusufonela abe Rapid Response, yibo abasebezakuthi besebebona ukuthi bengakwenza yini itest kumbe bengakukhuthaza ukuthi hayi, isolate at home.”

Enye njalo ingcwethi kwezempilakahle u Dr Henry Madzorera owake waba ngumphathintambo wezempilakahle ngesikhathi sombuso kahulumende womanyano, uthi isilinganiso sokungamatshumi ayisitshiyagalombili ekhulwini-80%, sabantu beZimbabwe sihlaselwa yilo umkhuhlane lanxa usiza kibo ungela laka kangako abathi ngesilungu yi mild covid esikhathini uziphelele nje umuntu engazange ananzelele ukuthi ubelawo.

Lalapho umuntu esetholakale elomkhuhlane uMadzorera uthi makabone ukuba akawutheleli abanye abemuli loba asebenza labo labangane.

Lanxa inani labatholakala belalomkhuhlane bengazange bavakatshela kwamanye amazwe lilokhe kuyilo eliphezulu uhulumende ethi ujatshuliswa yikuba isilinganiso esikhulu sabatholakala belalomkhuhlane besila kiwo.

Phakathi kwabedlula kancinyane inkulungwane ezimbili lengxenye-2,541 abatholakale belegcikwane leli eHarare, kusile abazinkulungwane phose ezimbili-1,962.

Kodwa Phakathi kwabangamakhulu amabili-202, asebebulewe yilesi sifo elizweni jikelele, iHarare iyakhokhela ngokuba labantu abedlula ikhulu-110, asebetshonile.

Udaba lwamacebo okumelana leCovid 19, siluphiwa nguMavis Gama
please wait

No media source currently available

0:00 0:03:41 0:00
XS
SM
MD
LG