amalinks wokungena

Breaking News

Abathenga Bethengisa Impahla Ethengwe Kwamanye Amazwe Bakhala Ngehlawulo yiCOVID-19 Certificate


Abathenga bethengisa okutshiyeneyo.

Abenhlanganiso yabaphila ngokuthengisa eyeBulawayo Vendors and Traders Association bathi sebebhalele uhulumende bemcela ukuthi ehlise inhlawulo yokuhlolwa leli gcikwane.

Lokhu kubikwe ngumnunzana Mike Ndiweni umqondisi wale inhlanganiso. “lnhlawulo yesithupha sePCR esitshengisa ukuthi umuntu uhlolwe ukuthi akala gcikwane leCOVID-19 iphezulu kakhulu. Sikhuluma nje kunje eZimbabwe abantu bakhangelelwe ukuthi babhadale amaUS$60 okuyimali enengi kakhulu. Esikwenzileyo yikuthi sibhalile istatement sizama ukuthi sicele uhulumende ukuthi akhangele inhlawulo yesithupha lesi njalo ukuthi yehliswe. SIfuna kube lendawo ezinengi ukuthi bathole les’isithupha ngoba indawo zakhona zilutshwane.

“Sesikhuthaza abantu ukuthi ukuze behlise inhlawulo yemali abayisebenzisa nxa besiya ngaphandle kwamazwe sithe bahambe bengamaqembu beze okuthiwa yi-bulking engxenye kungehlisa inhlawulo. Kulohlelo lolu nxa usiya emazweni angafana laboZambia labo Malawi engingathi asayinile amaphepha kuhlelo lweCOMESA, yimizamo esiyenzayo ukuthi sihlomise amalunga ethu ngolwazi.”

UNkosikazi Madade Ndlovu, olilunga leBulawayo Vendors Traders Association, uthi inengi labo seliqonda ebantwini abathengisa izithupha zeCOVID 19.

“Abantu bayafuna sibili ukucrosser but imali yakhona efunekayo yiyo ebamba abantu ngoba imali abayifunayo khathesi sekuze kusiba labantu abathi bayenza wonalawo ama certificate. Uzathola ukuthi amacross boarders ayawela kumascams wonalawo wokuthi umuntu uyabuya ekutshele ukuthi mina ngithi $40 omunye athi $10 but ngenxa yedesparation sesicina sithenga ama certificate wonalawo sesifika ngale eboarder sebesivalela phandle yilo uhlupho olukhona. Amanengi amacross boarder traders asewele khonalapho endaweni ezinjangazonalezo ngoba befika ngale bayabhampa abeboarder bayawazi ama certificate ayiwo.”

UNkosikazi Evidence Dube, omunye wabathenga bethengisa impahla etshiyeneyo, uthi ukuvulwa kwamaboarder akubancedi ngalutho ngemali ezifunekayo.

“Njengoba iboarder selivuliwe besicabanga ukuthi kuzaba lula ngoba omalayitsha babesidulisela besitshela ukuthi kunzima emgwaqweni akuhambeki, besivame ukuthi sizihambele thina but khathesi kuzaba nzima ngama requirements abawafunayo ukuthi bafuna icertificate. Ngokuzwa kwami icertificate siyiUS$60 …”

Umphathintambo wezamabhizimusi amancane laphakathi laphakathi, uNkosikazi Sithembiso Nyoni, wenqabe ukuthatshwa ilizwi kodwa uphendule ethi kakemukeli izikhalazo ezivela kwabaphila ngokuthengisa ngenhlawulo yokuhlolwa iCOVID-19.

Imizamo yokuxhumana lomqondisi wezempilakahle koBulawayo, uDokotela Welcome Mlilo, yehlule ngoba ethe usabambekile.

IBulawayo lokhe ihamba phambili ngenani labantu asebebanjwa iCOVID 19. Izolo kuphela kulabantu abangamatshumi phose amathathu- 29 abatholakale belayo edolobheni leli. Idolobho lonke lilabantu abedlula amakhulu amahlanu-573 abagulayo okwamanje.

Esilandelayo ngeseMatabeland South ngabantu abangaphezu kwamakhulu amabili lengxenye -259 abagulayo kuthi iHarare ilabantu abangamakhulu edlula amabili-210 abagulayo. Ilizwe lonke lilabantu abangaphezu kwenkulungwane abagulayo-1547 kulabake balaliswa yilumkhuhlane asebesilile abazinkulungwane phose ezithobamunwemunye-8,880.

Facebook Forum

XS
SM
MD
LG