amalinks wokungena

Breaking News

Ikhansili Yako Bulawayo Ithi Isilendlela Entsha Eyokuhlambulula Amanzi Abulele Abanye Abantu


Bakha amanzi endaweni engcolileyo.

Ikhansili yakoBulawayo ikhuthaza ukuba iqinise imizamo yokuhlolisisa indlela ezinengi zokuhlambulula amanzi ukuze abantu bavikeleke emikhuhlaneni eminengi egoqela eyesihudo.

Umkhuhlane wesihudo owaqamuka emizini eminengi yakoBulawayo wabulala abanye kuthi inengi lasala ligula yikho osokwenze kwaphuma linkuthazo ethi umanisiphala kumele aqakathekise umsebenzi wokuhlolwa kwamanzi asetshenziswa nguzulu.

UMnu. Rodney Jele, ukhansila kaWard 22, uthi bakhangelele ukulungisa amaphayiphi angasasebenziyo kwamanye amalokitshi.

“Thina ikakhulu ngikhangele isigaba seNkulumane sigoqela leNketa lapha esixhaswe khona ngamapartners okuthiwa yiBulilima Civil Works lapha esikhangelele ukuthi bazareplacer about 300 Water meters angasasebenziyo avuzayo kulokitshi le Nkulumane leNketa njalo sikhangelele ukuthi sikhiphe 400 main connection. Leyiproject yesibili eyakuqala sifakile amapipe amatsha.”

UNkosikazi Thandeka Mlilo, isakhamuzi semzini weTshabalala koBulawayo, uthi lokhe belokwesaba ukunatha amanzi aphuma empompini loba besethi aselungele ukunatha.

“Selokhe kwaqamuka umkhuhlane wesihudo edolobheni lakoBulawayo kunzima siyesaba ukunatha amanzi empompi engabiliswanga ngokwesaba ukugula. Khathesi nxa amanzi lamagetsi engekho kuyabe sekufanele sithenge amanzi okuyinto enzima.”

UNkosikazi Sukoluhle Mthethwa, isakhamuzi selokitshi leTshabalala, uthi ikhansili akumelanga ivale amanzi ngesikhathi lesi sezulu.

"Khathesi yisikhathi sezulu izulu liyana amanzi akumelanga ukuthi ngabe uyahamba kodwa silokudana ngalokhu okwenzakalayo okokuthi yikho okumele kulungiswe kuqala maybe kungatshintsha ukuqhamuka kwemikhuhlane evela emanzini esiwanathayo.”

:Izakhamizi zakoBulawayo zichaze ukuthi uhlelo lokuvala amanzi okwamahola angamatshumi ayisikhombisa (72)yikho okunye okudala ukuthi amanzi abuye elengcekeza ebagulisayo ngoba kwesinye isikhathi bebona ingcekeza yamasuweji egeleza ndawonye lamanzi abawanathayo.

Amakhansila amanengi asekela umbono wokuthi kumele ikhansili iqinise ukuhlola amanzi endaweni zamaLaboratory ukuze kungabi lokuqhamuka kweminye imikhuhlane yesihudo.

Facebook Forum

XS
SM
MD
LG