Inhlanganiso enika uzulu ukudla emhlabeni wonke jikelele eyeWorld Food Program (WFP) ithi izaqhubekela phambili inceda abantu kwele Zimbabwe ababhekane lendlala embi.
Lokhu kuphume emhlanganweni weWFP lentathelizindaba eHarare lapho umsekeli womqondisi wenhlanganiso le, uNkosikazi Valerie Guarnieri, aveze ukuba udubo lwendlala eZimbabwe ludinga ukusebenzelana kwenhlanganiso ezitshiyenyo lohulumende.
UNkosikazi Guarnieri, owake wasebenza eZimbabwe kusukela ngomnyaka ka2004 kusiyafika umnyaka ka2006, wazise ukuba unanzelele ukuthi isimo sendlala sibi.
“… IWFP isincedise ukuba labo abaswelayo bazatholakala ukuze sibancede. Ngibone lokhu emaphandleni eMasvingo. Ngibone indlala lasemadolobheni.”
Uqhubeke esithi usizo abalupha ele Zimbabwe ayisilo lwemali kuphela ngoba lugoqela ukwakhiwa kwamadamu ukuze abantu baqhubeke bezinceda kungelani lokuthi izulu linile loba hatshi.
Obemele uhulumende kulumhlangano, uMnu. Clifford Matorera, uthe uhulumende we Zimbabwe uzimesele ukulwisana lendlala.
“Sesikhangela abantu kuzigaba zonke. Siqale nge Harare lako Bulawayo. Sikhangela ukuba sikwenze endaweni zonke … Emadolobheni onke ukuze bancediswe.”