amalinks wokungena

Bayehluleka Abaphila Lobugoga Ukuthenga Ama Wheelchairs

  • Mavis Gama

UMnu. Tinashe Mageza ulenhlanhla ngoba yena ule wheelchair.

Abazali labondla abantwana abalobugoga baqhubeka besehluleka ukuthenga inqola zokuhambisa, ama wheelchair, ngoba beswela imali ngenxa yokuqhubeka kokoma komnotho welizwe.

Inani labadinga usizo kunhlanganiso eziphathisa ngama wheelchair libikwa liqhubeka lisanda.

Ugogo uChipo Moyana wase Chiredzi oleminyaka yokuzalwa engamatshumi ayisithupha ngomunye wababhekane lodubo, lokuswela imali yokuthengela yomzukulu wakhe i-wheelchair.

Ugogo u Moyana ulomzukulu oleminyaka yokuzalwa emine olobugoga obumenza ehluleke ukwenza loba yini obekusenza abe ngohlezi engobelethe lumzukulu.

Ugogo uMoyana uthi unina womntwana wayadinga ukuziphilisa (eGoli) ngemva kokuba uyise walomzukulu engazihluphi ukumnakekela.

Kodwa ugogo Moyana ngomunye wabaphiwe i wheelchair ngabe Rotary Club ngemva kokuba ekhalaze kibo.

Umkhokheli (president ) we Rotary Club, Harare Central unkosikazi Anne Nyakunu, ulandisa ngabahlangana lakho ekusebenzeni labadinga usizo kibo okufana lama wheelchair.

UNyakunu uthi lukhulu udubo lokuswela ama wheelchair kulabo abawadingayo ngoba ebiza imali enengi kakhulu.

Okusuka kungezelele kuloludubo yikuthi lokhe uzulu egijimisa elokuthi yikuloywa ikanti lowo ogogekileyo edinga nje usizo isikhathi sisesekhona.

Omunye wabasebenza kuhlangothi lwezokukhankasela imisebenzi ye St. Giles, uNkosikazi Salome Nziramasanga Masauso, ugcizelela ubunzima uzulu makhaza abhekana lalo nxa elesihlobo esilobugoga singesidinga usizo lwe wheelchair.

Abe Rotary Club besebenzisana labe St Giles bathi phose inkulungwane ezingamatshumi amathathu (30,000) zabantu abanganelisi ukuzithengela ama wheelchair la sebezokhalaza kibo.

Kunje sebanelisa ukudinga angamakhulu amane kuphela (400 ) kulawo adingakalayo uzulu eqhubeka ezodinga usizo kibo.

Iwheelchair ibiza imali engamadola angamakhulu amabili lamatshumi amahlanu ($250-00 ) okuyimali enganeliswa ngabanengi elizweni.

Facebook Forum

XS
SM
MD
LG