amalinks wokungena

'Wozani Lizothola Uncedo Lokwelamisa Abantwana'


Banengi abesifazana abadinga uncedo lokwelamisa eMpilo nxa kuqathaniswa labesilisa.

Isibhedlela seMpilo Central Hospital koBulawayo sibika ukuba liphansi kakhulu inani labomama labesilisa elizodinga usizo lwenhlelo ezehlukeneyo zokwelamisela khatshana imuli.

Isibhedlela lesi sikhuthaza abantu ukuba baze bazothola usizo ngoba kuqakathekile ukwelamisa kuhle imuli.

Inengi labesifazana babikwa beyibo abeza bezodinga ukuthola indlela zokwelamisela khatshana njalo bahle baqale ukufundiswa ngendlela ezehlukeneyo ngesikhathi bezobhalisa bezithwele bathi sebebeletha sebesazi indlela abazazisebenzisa uma beyabe kuyilabo abaqala ukuzithwala.
Inengi labomama bathi basebenzisa amaphilisi kuthi abanye bathi basebenzisa iloop ngoba ayibaletheli nkinga ezinengi uma beyisebenzisa.

Abanye abadinga uncedo esibhedlela seMpilo ...
Abanye abadinga uncedo esibhedlela seMpilo ...

UNkosazana Faith Rejoice Moyo, obezohlolisa ingane yakhe okweviki yesithupha eMpilo Central Hospital, uthe uyaqala ukusebenzisa indlela yokwelamisela khatshana njalo ubone amaphilisi engcono ngendlela abamfundise ngayo.

UNkosazana Chelesile Ndiweni uvumelane loMaMoyo esithi amsebenzela kahle amaphilisi njalo useke wawasebenzisa.

UNkosikazi Normatter Mahlangu uthi yena usebenzisa idepo ngoba uhlaba ngemva kwenyanga ezinthathu.

UNkosikazi Ayibongwe Ndlovu uthi usebenzisa amaphilisi njalo useleminyaka elitshumi ewasebenzisa.

Omunye njalo wesifazana, uNkosazana Patience Maseko, yena uthe usebenzisa indlela ye-implant efakwa phansi kwejwabu.
UNkosazana Bongani Lunga uthe usebenzisa ijekiseni ledepo njalo uselabantwana abane eyisebenzisa.

Kwele Zimbabwe kulendlela ezifika ezilitshumi lambili ezisetshenziswa ngabantu ekwelamiseni imuli kuhle, ezibalisa amaphilisi ayimihlobo emithathu, amajazi kamkhwenyana lomamazala, amajekiseni, ukuqunywa kwemithambo ethwala inhlanyelo kubomama lakubobaba, kanye lokulandela imvelo ngokungayi emacansini ngensuku ezithile.

Isibhedlela seMpilo Central Hospital ...
Isibhedlela seMpilo Central Hospital ...

Inengi labomama lisebenzisa amaphilisi lamajekiseni ehlukeneyo, kube lehlekana labaqunywa lababotshwa imithambo ethwala inhlanyelo yenzalo.

Isibhedlela seMpilo Central Hospital sikhuthaze uzulu ukuba aphatheke kunhlelo abalazo zokwelamisa kuhle imuli.

Bathi amajazi abakhwenyana labomamazala bapha abantu kungelanhlawulo, amaphilisi alidola, kuthi ukufaka iJadelle ngamadola alitshumi lanhlanu, ukuyikhupha ngamadola alisthumi.

IDepo Provera Ibiza amadola amabili kuphela.

Facebook Forum

XS
SM
MD
LG