amalinks wokungena

Breaking News

Abatsha Bafuna Imali Yokuzithuthukisa Ephansi Kwesikhwama seDevolution Fund


Abasakhulayo beGwanda baqhuba umhlangano wokuzama ukuzwisisa indlela imali yezabelo esetshenziswa ngayo.

Abasakhulayo basedolobheni leGwanda bathi bafuna ingxenye yemali eyabelwa izabelo phansi kwesikhwama sikahulumende eseDevolution Fund iqondiswe kunhlelo zabo zokuzithuthukisa njalo banikwe ithuba lokutsho imibono yabo ngokuthi isetshenziswe ngayiphi indlela.

Inengi labatsha abangene umhlangano oqoqwe ngabenhlanganiso eyeCommunity Youth Development Trust, baveze ukukhathazeka ngendlela limali eyabiwa ngayo besithi izakhamizi kumele zitsho ngokwazo ukuthi limali kumele isebenze ziphi inhlelo.

UNkosazana Zanele Nyathi uthi indlela limali eyabiwa ngawo iphiwa amakhansili idala ukuthi inhlelo zisuke emahofisini zisiya ebantwini kulokuthi uzulu atsho lokhu afisa kwenziwe.

“Lumbono ugcizelelwe ngozakhulayo obona ngokuqoqwa kwenhlelo zeCYDT uMnu. Norman Mudadisi othi limali kumele isetshenziswe mgceke.”

UMeya wedolobho leGwanda, uMnu Jastone Mazhale, ongene lumhlangano uveze ukuthi umanisipala weGwanda waphiwa imali engaphezulu kwesigidi esisodwa samadola $1,566m esetshenziswa ukuqedisa ukwakha itanka lamanzi leSpitzkop.

UMnu Thulani Moyo, usikomitshi weGwanda, uthi balokusuthiseka ngendlela umanisipala weGwanda asebenzise ngayo limali.

UMoyo ukhuthaza umanisipala ukuthi asebenzelane labatsha ekuphumeni lenhlelo ezithuthukisa abatsha.

Laloba uhulumende wabela umanisipala weGwanda imali eyedlula izigidi ezine zamadola $4,7 million phansi kohlelo lwemali yezabelo limali abakayiphiwa yonke ngoba ibuya ngeziqephu.

Facebook Forum

XS
SM
MD
LG