amalinks wokungena

Breaking News

UMongameli weZambia uMichael Sata Kasekho


OwayenguMongameli welizwe le Zambia uMnu. Michael Sata.

Umongameli weZambia, uMnu. Michael Sata, kasekho. USata ubhubhele esibhedlela se King Edward VII kwele Bhilithane lapho akade eyekwelatshwa khona.

Umsekeli wakhe, uMnu. Guy Scot, uzabephethe isikhundla sokukhokhela ilizwe kuze kwenziwe ukhetho lukamongameli kungakedluli inyanga ezintathu.

UScot utshele amaphephandaba eZambia ukuthi umuyi, owazimisela ukuthi kasoze anathe amanzi ahloliweyo afakwe embodleleni esithi uzanatha anjengalawo anathwa nguzulu, ubengumuntu kazulu.

Ubebizwa ngegama elithi King Cobra ngenxa yokukhuluma kwakhe engatshayi inja efihle uphini.

USata waqalisa ukugula okubonwa nguzulu kusukela ngoMpandula lonyaka okwenze wangena waphuma ezibhedlela njalo njalo.

Ubikwa eke welatshwa ngenyanga ephelileyo eNew York kwele Melika ngesikhathi esemhlanganweni omkhulu weUnited Nations General Assembly.

Uzulu wakwele Zambia uthi uSata wazama ukufeza izithembiso zakhe azenza engena embusweni okunjengokulungisa imigwaqo.

Kodwa kazange ayenze okunye ayekufisa okunjengokuhlolisisa imisebenzi eyenziwa yizizalwane zeChina ezivula amabhizimusi kulelolizwe afana lalawo ayenziwa yizizalwane zakulelo lizwe.

Ukubhubhela kwakhe eBhilithane sokudale inkulumo ngesimo sezempilakahle eZambia le Zimbabwe.

UGibbs Dube weStudio 7 uxhume uMnu. Vusumuzi Sifile Sibanda owenhlanganiso yezindaba yePANOS eLusaka othi uzulu udideke ingqondo ngokubhubha kukaSata obekhokhela ibandla elibusayo lePatriotic Front.

USata ngumongameli wesibili ofele embusweni kwele Zambia ngemva kuka mongameli Levy Mwanawasa.

Owake wabusa njalo kulelo lizwe uMnu. Frederick Chiluba wabhubha esengasekho embusweni. Owaba ngumongameli welizwe leli lithola uzibuse ngomnyaka ka1964, uMnu. Kenneth Kaunda, lokhe ephila loba nje eseluphele.

XS
SM
MD
LG