amalinks wokungena

Breaking News

IMDC Alliance Ithi Ibandla leZanu PF Selithumbe Abalandeli Balo Ababili eMasvingo


Abacatshangelwa ukuthi ngabalandeli bebandla leZanu PF batshaye izimota zabasekeli baka Mnu. Nelson Chamisa eMasvingo. (Source; MDC Alliance)

Ibandla leMDC Alliance lithi eleZanu PF liqhubekela phambili libavimba eMasvingo lapho abafisa ukwenza imihlangano lozulu. Lithi kulabatsha abambalwa abathunjwe namuhla ngabacatshangelwa ukuba bakubandla leZanu PF abancediswa ngabanye abadlelana lohulumende.

Lokhu kwenzekala ngesikhathi lumemetheka udlakela eMasvingo lapho umkhokheli webandla leMDC Alliance, uMnu Nelson Chamisa, ebhodabhoda kulesisabelo ekhuluma lozulu.

Ibandla leli lethule umbiko enkundleni yokuxhumana eyeTwitter othi kuthunjwe abanye babo eGutu abatshaywe ngabacatshengelwa ukuba ngabalandeli bebandla leZanu PF lapho uChamisa akade elomhlangano lezakhamizi.

Isikhulumeli samapholisa uSenior Assistant Commissioner Paul Nyathi uthi akulambiko oveza ukuba kuthunjwe uArnold Batirayi loAdmire Mufamba eGutu.

Kusanda kwenzakala phose okufanayo eNemwama Growth Point leBikita lapho uChamisa avinjwe khona ngabasekeli bebandla elibusayo.

Omela ibandla leZANU PF uMnu Patrick Chianamasa uvumile emhlanganweni ekhuluma lentathelizindaba ukuba abasekeli bebandla elibusayo bavimbe uChamisa ukuba akhulume lobo ngenxa yokuba ibandla leMDC Alliance bathi lalethela eleZimbabwe izijeziso zenotho.

Ekhuluma ngesehlakalo esenzakele namhlanje umsekeli wesikhulumeli seMDC Alliance, uMnu Felix Mafa, uthe ibandla leZANU PF liyesaba uChamisa ngoba uthandwa ngabantu.

UMafa uthi ibandla le ZANU PF kalisoze liphumelele kulokhu ngoba uzulu weZimbabwe uyamethemba uChamisa njalo nguye yedwa ozalungisa okuhlupha abantu.

Kodwa uMnu Mabuthi Moyo, umsekeli wohlangothi lwabatsha olubona ngezemsebenzi kubandla leZANU PF, uthi akula dlakela eZimbabwe.

Ingcwethi kwezombusazwe, uNkosazana Patience Sibanda, okunhlanganiso yeZimbabwe Democracy Institute, uthi eleZimbabwe seliphakathi kwesikhathi esinzima ngoba sokulungiselelwa ukhetho oluzakwenziwa ngomnyaka ka2023.

Loba ebhekane lodlakela, uChamisa uqhubekela phambili ngemihlangano yakhe eMasvingo lapho axoxa khona labantu ngokumele kwenziwe ngesikhathi sokhetho.

Udaba Esilethulelwe NguMlondolozi Ndlovu
please wait

No media source currently available

0:00 0:03:04 0:00


Facebook Forum

XS
SM
MD
LG