amalinks wokungena

Breaking News

Zdravko Logarusic: Kukhala Esami Isicathulo Ekubizeni Abadlali Bama Warriors


U-Zdravko Logarusic umqeqetshi weqembu elimela isizwe emdlalweni wenguqu, elamaWarriors

Umqeqetshi weqembu labesilisa elimela ilizwe emdlalweni wenguqu elama Warriors, uZdravko Logarusic uthi akulabantu abamtshela ukuba abize baphi abadlali njengalokhu okucatshangelwa ngabanye abalandeli bomdlalo wenguqu.

Inkokheli yeqembu lama Warriors ngeSonto yazise ukuba yibaphi abadlali ababizwe ukuba bazokuba yingxenye yamalungiselelo aleli qembu awokudibana leqembu le Algeria emidlalweni emibili kumkhankaso wokudinga amaqembu azakuyadlala kumidlalo yeAfrica Cup of Nations ngomnyaka ka 2022.

Ekhuluma lentathelizindaba zemidlalo umqeqetshi weqembu le Zimbabwe uZdravko Logarusic uthe yena akusilo qiniso ukuba bakhona abamtshela ukuba abize baphi abadlali kuqembu lama Warriors.

“Ngithanda ukubonga abasekeli bami ababili. Yibo engisebenze labo ekukhetheni abadlali. Akula omunye umuntu ophatheke kuloluhlelo ngoba kulamahunga hunga athi bakhona abalesandla ekukhethweni kwabadlali kodwa akulanto enjalo, ngumsebenzi oqhutshwe ngabaqeqetshi beqembu bodwa,” kutsho uLogarusic.

Abadlali ababizwe kuqembu lesizwe yilaba; Onozinti ngu Tatenda Mkuruva, oTalbert Shumba kanye lo Elvis Chipezeze. Imvimbi kubizwe uJimmy Dzingai, uAleck Mudimu, Jordan Zemura, Teenage Hadebe, Tendai Jirira, Divine Lunga, Tendayi Darikwa kanye lo Adam Chiksen.

Abadlali besiswini kulo Marshal Munetsi. Ovidy Karuru, Butholezwe Ncube, Tafadzwa Rusike, Kuda Mahachi, Knowlegde Musona, Terrence Dvukamanja, Marvelous Nakamba, Khama Billiat kanye lo King Nadolo.

Abagadli kubizwe u Prince Dube, Tino Kadewere kanye lo David Moyo.

Imeneja yeqembu lesizwe uWellington Mpandare uthi kabasoze besebenzise indizamtshina ezithwala uzulu kodwa kudingwe indizamtshina ezahambisa iqembu lama Warriors kwele Algeria.

“Silabadlali abathathu ababalisa uMarshal Munetsi, uMarvelous Nakamba kanye lo Tino Kadewere abalemidlalo mhla ziyithoba minwe mbili okutsho ukuba bazasuka ngosuku olulandelayo bafike kuleli mhla zilitshumi okulusuku esimele sisuke ngalo.

Ngalokho ke sesizasuka sindawonye ngendizamtshina edingelwe iqembu ngoba bekuzahlupha ukuba sithi sizahlangana labo kwamanye amazwe ngenxa yemithetho eyokuvikela umkhuhlane we Covid – 19,” kutsho uMpandare.

Iqembu le Zimbabwe likusibaya sika Group H njalo iqembu le Algeria yilo elihlezi phezu kwengalane lilemiklomelo eyisithupha kuthi ele Zimbabwe lisendaweni yesibili lilemiklomelo emine.

Amaqembu lawa azadibana emdlalweni wakuqala mhla zilitshumi lambili kuyonale inyanga kaLwezi aphinde njalo aphindane umphehlo ngemva kwensuku ezine kwedlule umdlalo wakuqala.

Umdlalo wesibili uzadlalelwa kwele Zimbabwe.

Imidlalo ye Afcon izaqhutshelwa elizweni lase Cameroon ngomnyaka ka 2022.

Ezemidlalo siziphiwa nguJoseph Njanji
please wait

No media source currently available

0:00 0:02:32 0:00

Facebook Forum

XS
SM
MD
LG