Ikhomishini ebona ngezokhetho, iZimbabwe Electoral Commission (ZEC), ithi ayisoze yenelise ukuqhuba ukhetho lokugcwalisa izikhala edale lephalamende lakumakhansili ngomnyaka ozayo ngoba ayilamali.
Isiphathamandla salikhomishini uMnu Otloile Silaigwaya utshele idale lephalamende izolo ukuthi ukuze kuqhutshwe amaby-elections okugcwalisa izikhala ezikhona khathesi kuphela bafuna imali ephezu kweZ$1 billion.
USilaigwana uthe kulakho ukuvukela ezinye izikhala njalo kuyiwa emnyakeni omutsha, khona athi kuzakhuphula imali yokhetho efunakalayo.
Uthe ukuze benelise ukuqhuba inhlelo zabo zokhetho ngomnyaka bafuna imali engangeZ$12 billion.
I-ZEC yayithe amaBy-elections azakwenziwa kulinyanga mhkaka 5 kodwa yasuka yavinjwa nguhulumende esithi ukhetho lulakho ukumemethekisa umkhuhlane weCovid-19.
Indawo ezinengi zisele zingelabameli edale lephalamende lakumakhansili ngemva kokuxotshiswa kwamalunga eMDC Alliance ngumkhokheli weMDC-T uNkosazana Thokozani Khupe.
Ingcwethi kwezombusazwe uMnu Effi Dlela utshele iStudio 7 ukuthi yinto embi kakhulu ukuthi izigaba zihlale zingelabameli kumakhansili lasephalamende ngoba kuthiwa akulamali yokwenza ukhetho.
