Owayengumgadli weqembu lenguqu eleHighlanders kanye leqembu elimela ilizwe le Zimbabwe elama Warriors, uZenzo Moyo, uthi akusizi ukuthi umuntu abukwe esefile yena engazange athole usizo ngesikhathi ephathekile.
UMoyo ukhulume lawa mazwi ngemva kokudlula emhlabeni kukamqeqetshi womdlalo wenqindi uPhilip “Striker” Ndlovu yena obelomkhuhlane wemvukuzane eyohlobo lwe prostate cancer.
“Kumele umuntu azwe ukunukelela kwamaluba akhe esaphila. Singagijimeli ukuthi nxa sekuwonakele kube yilapho esiphakama khona. Khanaphana eqala ukugula kwakumele sihlangane sibone ukuthi singamphathisa njani umdala. Khathesi ukuthi sibe sesimbiza ngeqhawe eselele akusancedi. Kumele sihlanganenini umuntu ephila sithakazelelane empilweni,” kutsho uMoyo.
UMoyo ngakibo ngomakhelwane bakamuyi njalo uthi uNdlovu udlale indima enkulu ekukhuleni kwakhe. Intathelizindaba yezemidlalo esebenzela iphephandaba leChronicle, uRicky Zililo, ulobe kakhulu esazisa uzulu ngokugula kuka Ndlovu njalo laye uveze ukudana ukuba umuyi akazange athole usizo olwaneleyo.
“Ngomnyaka ophelileyo ngoMabasa ngabhala indaba lapho ayesithi udinga inkulungwane ezintathu zamadola aseMelika ukuze ayehlinzwa enze okuthiwa yi trans urethral resection of the prostate, wehluleka ukuthi ayithole leyomali. Lonyaka ngike ngaya ngayakhuluma laye ngaqala phansi njalo utshilo ukuba usedinga inkulungwane eyodwa yamadola aseMelika eyokuthi athole ipermanent catheter layo kayitholakalanga. Ungakhangela uqathanise umsebenzi awenzele umphakathi lesimo abhubhe eseyisona akuhambelani ngitsho lakancane,” kutsho uZililo.
UStriker uqeqetshe ingqungquthela zomdlalo wenguqu eziphakamise izicoco kwele Zimbabwe kanye lakuzwekazi lase Africa ezibalisa uThamsanqa Dube, uElvis Moyo, uModecai Donga, uAmbrose Mlilo, uMaqhawe Ndlovu kanye lo Meluleki Ngulube. Wedlule emhlabeni mhla zilitshumi lesikhombisa njalo kubikwa ezabekwa emathuneni eLady Stanley ngeSonto mhla zingamatshumi amabili kunyanga kaNhlangula.
