WASHINGTON DC —
Inhlanganiso ekhankasela ukhetho olukhululeyo, iZimbabwe Election Support Network (ZESN), ithi balutshwana abantu ababhalisayo kuluhlu lwabantu abazavota kukhetho oluzakwenziwa ngomnyaka ozayo.
Inhlanganiso le ithi isizatho yikuthi iZimbabwe Electoral Commission (ZEC) kayizange imemezele kabanzi ukuthi isiqalisile uhlelo lolu.
IZEC ithi isibhalise abantu abedlula inkulungwane ezilitshumi lanye selokhu iqale uhlelo lolu kumaviki amabili edluleyo.
Ithi iZEC kumele iqhube uhlelo lokulimukisa uzulu ngaloluhlelo emisakazweni, emaphephandabeni kanye lokwethekelela indawo ezitshiyeneyo.
Ummeli weNkayi South edale lephalamende uMnu Abednico Bhebhe ufakazele iStudio 7 ukuthi laye uhambe wayabhalisa eNkayi ngoLwesibili wathola lakho kungela bantu.
