amalinks wokungena

Breaking News

Zilwisa Ukubuyiselwa Ekhaya Iziphepheli zeZimbabwe EziseBotswana


Iziphepheli zeZimbabwe ezedlula amakhulu amathathu ezihlala kweleBotswana sezibhekane lokuphindela ekhaya ngaphandle kokuthanda kwabo ngemva kokuba zilahlekelwe yisicelo sokuthi zingabanjwa ngamandla ukuthi ziphindele.

Iziphepheli lezi zayala ukuphindela ekhaya ngesikhathi abanye bazo bebuyiselwa nyakenye. phansi kohlelo lukahulumende weBotswana lokuphindisela emuva amakhulu amane eziphepheli zeZimbabwe ekuqaleni komnyaka odluleyo oka 2020.

Abanye abafana lomnuzana Wasu Chibi basala ngemuva belwisana lokuthi bengabuyiselwa ekhaya.

Kodwa sokumngceke ukuthi indlela eya ekhaya isivuthiwe ngemva kokuba inhlanganiso ebona ngeziphepheli umhlaba wonke jikelele, eyeUnited Nations High Commission on Refugees, iyale isicelo seziphepheli ukuthi ziqhubeke zihlala kweleBotswana.

UChibi uthi sebetshelwe ukuthi akula ngeyinye indlela kodwa belobe ingwalo ezitshengisa ukuthi balesifiso sokuphindela emuva.

“Sesitshelwe ukuthi angeke siphathiswe ngoba eZimbabwe sokulungile. Bayalile isicelo sethu noma sizamile ukuthi sibatshengise isizatho. Sesiqale ukuloba incwadi zokuphindela ekhaya, ama voluntary repatriation form.”

Uqhubeke esithi konke lokhu kwenzakala noma nje bebhalele iUNHCR ukuthi bona kabafuni ukuphindela eZimbabwe ngaphansi komumo okhona.

“Thina abanye asilani ekhaya. IZANU PF izasitshela ukuthi izasinika imali, bazasinika izindlu kodwa siyakwazi ukuthi akulamali. Khathesi kulecoronavirus, abantu bayafa.”

Inengi leziphepheli enkambeni yeziphepheli eyeDukwi engaphandle kwedolobho leFrancistown, ngabasekeli bebandla leMDC ababalekela udlakela olwaqhamuka ngokhetho lokudinga umongameli eZimbabwe ngomnyaka ka2008.

Umnunzana Chibi uthi bazimisele lokuphanyeka udaba lwabo emthethwandaba kungumzamo wokucina ukuthi bengabuyiselwa eZimbabwe.

“Ma kuyikuthi singathola igqwetha sizakuya emthethwandaba siyekuzwa ukuthi kanti vele igama elithi voluntary repatriation kutshoni. Thina ngolwazi lethu, ivoluntary kutsho ukuzimisela ukuthi ufuna ukuphindela ekhaya.”

Ihofisi yommeli weZimbabwe kweleBotswana yona ithi ikhangelele ukuthi iziphepheli ziphindele ekhaya ngoba isimo sesiguqukile, lo kungumbono kahulumende weBotswana kanye lenhlanganiso ye UNHCR.

XS
SM
MD
LG