amalinks wokungena

Breaking News

Amasotsha Lamapholisa Bavimba Abadabuka eZimbabwe Abazama Ukungena eSouth Africa


Abanye abantu abasemngceleni wakwele South Africa lele Zimbabwe. (Photo: International Cross Border Association)

Umkhankaso omkhulu osungulwe yiSouth Africa wokuvimba abeZimbabwe abazama ukungena elizweni ngokungekho emthethweni, usuthole insolo kakhulu kulabo abathi bekufanele kuqala uhulumende weAfrican National Congress (ANC) alwisane lemikhuba kahulumende weZanu PF esibulele ezomnotho.

Kulo umkhankaso osungulwe ngempelaviki, uhulumende weSouth Africa usethumele amabutho, amahelicopter, amapholisa lezinye ingatsha zomvikela emngceleni weZimbabwe leLimpopo.

People trying to cross the South Africa/Zimbabwe border ... (Photo: International Cross Border Traders Association)
People trying to cross the South Africa/Zimbabwe border ... (Photo: International Cross Border Traders Association)

Imigwaqo esuka eBeitbridge isiya emadolobheni atshiyeneyo akwele South Africa layo isigcwele abezomvikela abazama ukuvimba abeZimbabwe laba.

Umphathintambo wogatsha lwendaba zasekhaya kwele South Africa, uMnu. Aaron Motsoaledi, uthi phansi kwalo umkhankaso sekubotshwe amakhulu ezizalwane zeZimbabwe.

“Kubotshwa abantu abedlula amakhulu amahlanu ngelanga kusetshenziswa amaroadblocks, indizamtshina lezikepe.”

UMnu. Motsoaledi uthi kuleli qula kulalabo abazama ukungena elizweni bengelamaphasipoti. Bakhona njalo ababanjwa bezama ukusebenzisa incwadi zamanga zokuthi abalawo umkhuhlane weCovid-19.

Inengi lezizalwane zeZimbabwe ezisebenza kweleSouth Africa bezisekhaya kukhefu lekhisimusi kantike manje sekuyisikhathi sokuphindela emsebenzini.

Banengike abasebenza kweleSouth Africa bengalazo incwadi ezisemthethweni zokusebenza. Abanye lamaphasipoti imbala abalawo.

Leli nyathelo likahulumende weSouth Africa selisolwe kakhulu zinhlanganiso lamabandla ezombusazwe aweZimbabwe kwele South Africa.

Umngcinisihlalo wenhlanganiso yeZimbabwe Community in South Africa njalo engunobhala jikelele webandla leZimbabwe Communist Party, uMnu. Ngqabutho Mabhena, uthi aluba ibandla leANC lilesibindi sokukhuza eleZanu pf ngemikhuba emibi ewisa umnotho ngabe lonke loluhlupho alukho.

“Kuyacaca ukuthi ukuwa komnotho weZimbabwe lamaeconomic policies esiwalandelayo lenkohlakalo icorrupotion yikho okwenza ukuthi umnotho ufe okwenza ukuthi abantu beZimbabwe abatsha ikakhulu babone kungaselasizatho sokuthi badinge umsebenzi eZimbabwe bakhethe ukuthi baze kweleSouth Africa.”

Umgcinisihlalo webandla le MDC Alliance kwele South Africa, uMnu. Trust Ndlovu, yena uthi yebo abatshotshozeli ukuthi abantu bangenge kweleSouth Africa ngokusemthethweni kodwa iANC layo ilesandla enkingeni ezibhakane leZimbabwe.

“Njalonje kuba nama elections, bayahamba laphana bayavumelana lenkohlakalo eyenziwa yiZanu yokurigger ama elections.Futhike ma kumele bangenelele abazimiseli ukulungisa inkinga zalaphaya. Uma bezathumela amahelicopter, amasotsha lamapholisa leyonto yinto eyesikhatshana. It’s a temporary panacea.”

Abanye abantu abazama ukudlula emngceleni wakwele Zimbabwe lelizwe leSouth Africa. (International Cross Border Traders Asssociation)
Abanye abantu abazama ukudlula emngceleni wakwele Zimbabwe lelizwe leSouth Africa. (International Cross Border Traders Asssociation)

Isikhulumeli sebandla leZanu PF kwele South Africa, uMnu. Kennedy Mandaza, ukhuthaza iSouth Africa ukuthi ihloniphe amalungelo ezihambi ngesikhathi iqhuba lo umkhankaso.

“Sikhuthaza izizalwane zeZimbabwe ukuthi ziphathe zonke incwadi ezisemthethweni ezidingekayo ukuze zivunyelwe ukungena kweleSouth Africa.”

Isikhulumeli sebandla leThe Patriotic Front, uMnu. Mxolisi Ncube, yena uthi iSouth Africa yazi mhlophe ukuthi lumkhankaso awusoke umise izizalwane zeZimbabwe ukungena kuleli kantike iyakwazi mhlophe efanele ikwenze ukuze abeZimbabwe bahlale lokusebenza elizweni labo.

“Ukukhuluma ngodaba lweZimbabwe akutsho ukukhuluma kuphela lohulumende obusayo kodwa amabandla wonke eZimbawe asephalamende langekho ephalamende lezinhlanganiso eziphethe uzulu ezifana lamasonto, inhlanganiso ezizimeleyo, izinduna, ngoba kufanele ukuthi ekugcineni sihlangane ndawonye sibe lombono munye. Sifuna ukuthi umphakathi weZimbabwe uzibambele wona amandla okulungisa lokho okuhambe kubi ngokomkhonomi lakwezepolitiki.”

Imizamo yuokudinga ukuphawula komeli weZimbabwe kweleSouth Africa ngaloludaba ibingakaphumeleli ngesikhathin sisiya emoyeni.

Facebook Forum

XS
SM
MD
LG