amalinks wokungena

Breaking News

Ababalisi Abakhonona Ngeholo Eliphansi Bathi Kabayi Emsebenzini


FILE: Ababalisi ngesikhathi bekhalala umsebenzi. (Photo: ZIMTA)

Ababalisi abanengi bathi kababuyeli ezikolo ngoMvulo ngenxa yokuthi uhulumende kakhuphulanga iholo labo.

Inhlanganiso zababalisi zithi kusobala ukuthi ababalisi abanengi kabayi ezikolo kusasa ngoba bakhonona ngeholo eliphansi. Bazakwenza lokhu loba kulemibiko eyethulwe luhlangothi olubona ngokuqhatsha izisebenzi olwePublic Service Commission oluthi luzakhuphula iholo lezisebenzi zonke eZimbabwe.

Aluvezanga ukuba iholo lizakhutshulwa ngesilinganiso esinganani. Uhulumende ubika njalo ukuthi usedinga ababalisi abafika inkulungwane eziyisithupha – 6,000 ukwenzela ukuthi abantwana bafunde kahle ngesikhathi kuvinjwa ukumemetheka komkhuhlane weCOVID-19.

Umqondisi weZimbabwe Teachers’ Association, uSikhwicamfundo Sifiso Ndlovu uthi ababalisi bakhathele ngeholo eliphansi ngakho-ke kabasoze bahambe ezikolo.

UNdlovu uthi ababalisi abanengi kabalamali yokugada amabhasi lemitshova.

“Ababalisi ngokusitshela kwabo bathe bona kabayi esikolo. Esikufakazayo yikuthi bathe kabayi njalo thina lathi asilandaba lakho ukuthi sibakhuthaze ngokuthi baye kumbe bengayi, silendaba lokuthi uhulumende laye kaphangise agcwalise izithembiso zezicelo zabo lokuthi bazuze imali eyenelayo ukuthi baye emsebenzini. Ngokuma kwezinto, okukhona khathesi yikuthi zizavulwa izikolo ababalisi bengekho.”

Lokhu kusekelwa nguNkosikazi Nokuthula Hlabangana Mpofu, okunhlanganiso eyeProgressive Teachers’ Union of Zimbabwe, othi kabalaqiniso lokwethulwe yiPublic Service Commission.

Umphathintambo kahulumende obona ngezemfundo, uMnu. Cain Ginyilitshe Mathema, uthi kazilutho ngokubhekane lababalisi. UMathema uthi ziyavulwa izikolo kusasa kulandela ukulungiselela okuphakeme okwenziwe nguhulumende.

“Abantwana abakuzinga lika Grade 7 labaku Form 4 bayavula kusasa. Sesilamaviki amabili savula izikolo zalabo abaloba imihloliso yeCambridge. Singeke savula izikolo singalungisanga okufunakalayo. Lisibona engani sizinyamazana ezivula izikolo singanaki okufunwa ngabantu.. Okwababalisi kangikatshelwa ukuba balenkinga. Kayisithi sodwa esivula izikolo.”

UMnu. Japhet Moyo, unobhala jikelele wenhlanganiso yeZimbabwe Congress of Trade Unions, uthi kumele uhulumende alungise uhlopho lwezisebenzi.

UNkosikazi Sibonokuhle Xaba, isakhamuzi seNjube koBulawayo esilomntwana okumele ayefunda kwesinye isikolo edolobheni leli, uthi kuyabakhathaza kakhulu nxa ababalisi bengasoze bahambe ezikolo ngoMvulo.

UNkosikazi Xaba uthi kunengi osokonakela ngenxa yabantwana abangayi ezikolo.

Akwaziwa okuzakwenzakala ezikolo njengoba ababalisa betshaya phansi ngenduku besith kababuyeli ezikolo uhulumende laye esithi uyazama ukulungisa konke okubhekane lababalisi lezifundi.

Udaba Esilethulwe nguMavis Gama
please wait

No media source currently available

0:00 0:04:56 0:00


Facebook Forum

XS
SM
MD
LG