amalinks wokungena

Breaking News

Abalimi eZimbabwe Sebeze Befuna Ukukhalala Ukulima


Uzulu umangaliswa yikungani kwezulu lokudula kwenhlanyelo.

Abalimi ezigabeni zeManicaland, Matabeleland North, Masvingo leNkabazwe bathi sokuseduze ukuthi bakhalale ukulima lonyaka ngenxa yokudula kwenhlanyelo, ukungani kwezulu kanye lokuswelakala kwezokulimisa.

Abalimi abakhulume leStudio 7 ngoMvulo bathe inhlanyelo ekhona ezitolo iyadula okumangalisayo.

Baphinde bathi izifuyo zokulimisa zicake okokuthi kazingeke zadonsa amakhuba ngenxa yokutsha kwamadlelo kulandela ukungani kwezulu.

Omunye wasebefuna ukukhalala ukulima nguMnu. Bhekizitha Nxumalo isakhamuzi seDaluka eLupane, eMatabeleland North otshele iStudio 7 ukuthi kunzima ukuya emasimini lonyaka.

UNxumalo uthe, “Ngikhuluma khonamanje okuhluphayo yikuswelakala kwezulu njalo iyadula inhlanyelo ezitolo ezilapha. Siyahlupheka kakhulu njengoba singakwazi lokuthi kuzakwenzakalani emkhathini.”

Uphinde wathi kumele uhulumende azame ukunceda labo abafuna ukulima lonyaka.

“Kodwa okusobala yikuthi abantu abanengi sebefuna ukukhalala ukulima.”

Sixoxe njalo loMnu. Everson Ndlovu ingcwethi kwezokuthuthukisa umnotho kazulu othe lonyaka akumelanga uzulu alime umumbu endaweni ezingajayelanga ukuna izulu elinengi.

UNdlovu uthe, “Okusobala yikuthi abalimi kumele badinge inhlanyelo yophoko lokunye okutshiyeneyo.”

Ukuguquka komkhathi okubaselwa yimvimbi yeEl Nino kutshengisa ukuthi akulazulu eleneleyo lonyaka eZimbabwe.

XS
SM
MD
LG