amalinks wokungena

Breaking News

Abantu beZimbabwe Bakhala Ngokusilela Kwemali Ngosuku Lwe Khisimusi


Bathakazelela usuku lweKhisimusi.
Bathakazelela usuku lweKhisimusi.

Abantu beZimbabwe bananza usuku lweKhisimusi abanye bekhonona ngokusilela kwemali njalo langomnotho welizwe okusimo esibi kakhulu.

Loba kunjalo abanye benelisile lamuhla ukuthi bajabule lezihlobo labangane. Abanye bahlabe inkomo, imbuzi lezimvu ukwenzela ukudla inyama ngosuku lweKhisimusi.

Usuku lolu luqakatheke kanganani njalo lwavela ngaphi? Ukuze sizwe okunengi ngalokhu, sixhume uMpostoli Midian Dube, owe Foundation of Life Ministries International, othi luqakatheke kakhulu usuku lweKhisimusi.

Uthi usuku lolu lukhuthaza ukuhlalisana kakhe labanye abantu njalo lokuphila ngendlela eyiyo.

'IKhisimusi Lusuku Oluqakathekileyo eZimbabwe'
please wait

No media source currently available

0:00 0:03:42 0:00

Kusenjalo, ngesikhathi inengi leZimbabwe elihlala eBotswana lisiya ekhaya ngekhefu leKhisimusi kulabanye abadlalela lolusuku elizweni elingomakhelwane, ngenxa yezizatho ezitsheyeneyo.

Ikhefu leKhisimusi yisikhathi sokuthi inengi liyehlangana lezihlobo labangane, kugidwe liphuma lize liyetshona.

Imbuzi, inkomo, inkukhu, kanye leminye imihlobo yenyamazana, kuyahlatshwa ngalelilanga kudliwe kubemnandi.

Abavela ngaphandle kwelizwe yibo abakhangelelwe kakhulu ukuthi baze lezifela emlonyeni.

Kodwa abanye abasebenza ngaphandle kwelizwe, bayehluleka ukuyakholisa lemuli labangane ngesikhathi seKhisimusi, abanye ngokuthanda kukanti-ke abanye ngezibambeko.

UMnu. Ray Ndlovu, osebenza eGaborone, uthi ubelesifiso sokuya ekhaya kodwa ubambekile ngezomsebenzi, ngakho uthumele imali ukuthi izihlobo ziyenelise lazo ukubonakala zisidla njalo zigida ngekhefu leKhisimusi.

“Ngiyasebenza ngalesisikhathi, bengilesifiso sokuya ekhaya kodwa angenelise. Noma kunjalo, ngenelisile ukubathumela imali, ukuthi izihlobo zami zenelise ukukholisa ikhisimusi njengabanye.”

Esinye isizalwane seZimbabwe, uMnu. Andreas Sibanda uthi yena uhlala lemuli yakhe eBotswana, ngakho-ke kaboni isizatho sokuya ekhaya.

“Imuli yami ngilayo khonapha eBotswana, ngakho asikho isidingo sokuthi ngiyekhaya, njalo indleko zakhona zokuhamba ngesikhathi lesi ziphelu.”

Esinye njalo isizalwane seZimbabwe esihlala kwele Botswana, uMnu. Melusi Dube, uthi imuli yakhe izakwethekelela eBotswana badle bakholise, kungabilesidingo sokuthi yena aye eZimbabwe.

“Angihambanga ekhaya, kodwa imuli yami yiyo engivakatsheleyo ukuthi labo bezokuzwa ukuthi ikhisimusi kweleBotswana injani.”

Abanye njalo bathi iKhisimusi eBotswana imnandi ngenxa yesimo esihlalisekileyo somnotho, konke kukhona emavinkilini, ikakhulu okufana lamafutha ezimota kanye lemali.

Kwele Zimbabwe, inengi lihlaba umkhosi ngokusilela kokufana lemali, ukudula kwamafutha ezimota, kanye lokukhuphuka kwentengo yempahla emavikilini.

XS
SM
MD
LG