amalinks wokungena

Breaking News

'Abantu Abasanda Kuvotelwa eZimbabwe Kumele Basebenzele Uzulu Hatshi Ukulonda Izikhundla'


Akade besethulela uzulu imibono yabo emhlanganweni kwele South Africa.

Umanyano wenhlanganiso zikazulu lamabandla ezenkolo obunjwe lonyaka eZimbabwe owe Civic Society and Churches Joint Forum (CSCJF) usukhuthaze izizalwane zeZimbabwe ezisemazweni ukuthi zincedisane lezisekhaya ukubamba ngamandla bonke abakhethelwa ezikhundleni zezombusazwe ukuthi benze imisebenzi abayikhethelwayo hatshi ukuchitha isikhathi bephikisana ngokubusa ilizwe.

Ekhuluma lequla labeZimbabwe eJohannesburg, umqondisi wenhlanganiso ye CSCJF, uNkosazana Abigale Mpambi, uthe kuyadanisa ukuthi abafakwe ezikhundleni zezombusazwe sebefundise uzulu ukuthi achithe isikhathi sonke elwela ukuthi bangene ezikhundleni eziphezulu.

UNkosazana Mpambi ufuna abasemazweni bancedisane labaseZimbabwe ukubamba ngamandla ukuthi labo abakhethiweyo kusuka kumongameli welizwe, abamelei bedale lephalamende, omeya, lamakhansila benze umsebenzi abawukhethelwayo hatshi ukuphosana ngaqatha kubangwa izikhundla.

Uthi umzabalazo owasungulwa ukuze kulwelwe impilo kazulu usuphenduke waba yindlela yokuphucula impilo yabasezikhundleni

“Abantu abasela okunye ababhekane lakho kumbe sithi abakucabangayo ngaphandle kwepolitics. It is sore, 38 years after independence ukuthi sibe lokhe sifuqwa ngamapoliticians besenza ukuthi silwe kumbe silwele bona, hayi lokho sithi hatshi.”

Obona ngokuqoqwa kwenhlelo zale inhlanganiso emazweni, uMnumnzana Mehluli Dube, uthi njengenhlanganiso bafuna ukuqeda umkhuba wokuthi izinto zonke ezihluphayo kukhulunywa ngazo nxa kulokhetho kuphela kuthi iminyaka yonke ichithwe sekuphikiswana ngokuthi ngubani onqotshiweyo kumbe onqobileyo.

Abanye abantu abangene umhlangano obuqoqwe zinhlanganiso ezizimele zodwa kwele South Africa.
Abanye abantu abangene umhlangano obuqoqwe zinhlanganiso ezizimele zodwa kwele South Africa.

“Sifuna ukuthi wonke umuntu aphatheke kwezomnotho, lapha ahleli khona abenenhlalakahle abe nempilakahle, sehlukane ngokubhekana ngokokhetho lokhu ngokwababusayo laba. Thina sifuna izinkokheli njalo sifuna inhlalakahle lokuthi siphatheke kwezomnotho.”

Obona ngokuhanjiswa kwenhlelo zenkampani y All Diamonds kwele South Africa, uNkosazana Lisakazi Mapoma, laye ukhuthaza abeZimbabwe abasemazweni ukuthi labo basukume balwele ukuphuculwa kwempilo kazulu bengameleli ukwenzelwa izinto yilabo abasekhaya.

Linhlanganiso ithi sesedlule isikhathi sokuthi iZanu PF ikhale ngeMovement for Democratic Change kuthi njalo iMDC layo ikhala ngeZanu PF. Ithi IZanu PF yiyo ekuhulumende ngakho-ke ayibe leqiniso lokuthi uzulu uthola konke okufuze akuthole kuhulumende. Ithi ngokufanayo iMDC yiyo ekhokhela amakhansili emadolobheni ngakho kufanele ibone ukuthi izakhamizi ziyakuthola konke ezifanele zikuthole.

Udaba Esilethulelwe NguBenedict Nhlapho
please wait

No media source currently available

0:00 0:02:27 0:00

Facebook Forum

XS
SM
MD
LG