amalinks wokungena

Abantwana Kabasoze Bavunyelwe Ukubhala Imihloliso Bengakabhadali Imali Yezifundo


Abantwana besikolo kabasoze bavunyelwe ngezinye izikolo ukuba babhale imihloliso bengakabhadali imali yezifundo.

Ezinye izikolo koBulawayo zibikwa sezazise abazali ukuthi abantwana abasoze bavunyelwe ukubhala imihloliso yokuphela komnyaka nxa bengabhadalanga inhlawulo yesikolo yama school fees.

Imithetho yeZimbabwe ithi akulamntwana okumele axotshwe esikolo ngenxa yokungabhadalwa kwenhlawulo yesikolo. Ngokunjalo inengi labazali likhathazekile ngaleli nyathelo.

Omunye wabo nguMnu. Lanselo Chiveya othi lapho okufunda khona umntanakhe sebebazise ukuthi abantwana abasoze babhale imihloliso nxa bengabhadalanga.

Omunye njalo umzali, uNkosikazi Sambulo Ndlovu, uthe lokhu kubisela abantwana emuva ngoba nxa bengabhalanga inhlawulo yemihloliso yokuphela komnyaka kuyahle kubavimbe ukuqhubekela phambili esigabeni esilandelayo semfundo yabo.

UNkosazana Yemurai Tagwireyi, ongomunye wabazali, uthi lokhu kwengezelela izikwelede lendleko zesikolo ngoba nxa umntwana esezaphinda izinga elilodwa.

Kodwa uMnu. Dickson Moyo, olilunga leSchool Development Committee kwesinye isikolo ale ukusichaza, uthe lokhu bakwenzela ukuthi bakhuthaze abazali ukuthi babhadale indleko zesikolo.

Abohlangothi lwezemfundo koBulawayo bona balile ukuphendula imbuzo yeStudio 7 besithi basafuna ukuphenya ukuthi izikolo ezenze lokhu yiziphi.

Facebook Forum

XS
SM
MD
LG