amalinks wokungena

Breaking News

Izithunywa zeANC Zikhulumisana Leziphathamandla Zebandla leZanu PF Kuphela


UMnu. Gwede Mantashe ukubandla leAfrican National Congress yakwele South Africa. REUTERS/Siphiwe Sibeko - RTSBCKU

Izithunywa zebandla leAfrican National Congress (ANC) zithi zizabuyela ekhaya zikhulumisane kuphela leziphathamandla zebandla leZanu PF.

UMnu. Ace Magashule, unobhala jikelele webandla leANC, utshele intathelizindaba eHarare namuhla ukuthi bakhulumisane leziphathamandla zeZanu PF bakubona kufanele ukuthi bazabuyela ekhaya balungiselele ukuphenduka kwele Zimbabwe bazekhulumisana labantu abatshiyeneyo.

“Sesithole izicelo ukuba sihlangane labanye abafana lebandla leTransform Zimbabwe, uDokotela Simba Makoni, iZAPU, iZimbabwe Human Rights NGO Forum, iMDC Alliance lommeli weMelika kuleli. Kodwa ndawonye leZANU PF sibone engani kulungile ukuba sibabone. Sizalungiselela sibe sesiphenduka sizohlangana lenhlanganiso lezi.”

UMagashule, othunywe loNkosazana Lindiwe Zulu, uMnu. Gwede Mantashe, uMnu. Tony Yengeni, uMnu. Enock Gondongwana, uNkosikazi Nosiviwe Nqakula labanye, kade bekhangelelwe ukuthi bazahlangana leziphathamandla zeMDC Alliance, abokholo lweSiKhristu, iZapu lezinye inhlanganiso.

Izithunywa zika Mongameli Cyril Ramaphosa – uNkosikazi Belaka Mbete, uDokotele Sydney Mufamadi loMnu, Ngoako Ramatlodi – babuyela kwele South Africa bekhulumisane kuphela loMongameli Emmerson Mnangagwa.

Lokhu kwachothozwa ngabantu abanengi kwele Zimbabwe abathi sokuzakele ingwe elizweni.

Bekukhangelelwe ukuthi uMagashule labanye bakhe bazakhuluma ngokwenzakala eZimbabwe okulabantu abathunjwa bahlayana labanye abatshaywa okumangalisayo kulandela ukuzama kwabo ukutshengisela emigwaqweni bekhonona ngobukhohlakali lokunye okuhlupha uzulu.

Abantu abanengi bathi bahlutshwa nguhulumende eZimbabwe lobanje ibandla leZanu PF likuphika lokhu lisithi kulabantu abafuna ukususa uMongameli Mnangagwa esikhundleni okungekho emthethweni.

UMnu. Prince Dubeko Sibanda, okubandla leMDC Alliance, uthi kuyayangisa okwenziwe libandla leANC elikhethe ukuthi izithunywa zalo zihlangane kuphela leziphathamandla zebandla leZanu PF.

“Ababuyele ekhaya bayetshela uRamaphosa abakutholileyo. Besikwazi ukuthi bazakwenzani. Lokhu kutsho ukuthi sesizimele sodwa. Sizabona okokwenza.”

Lokhu kugcizelelwe nguMnu. Mlungisi Dube, olwela amalungelo kazulu, othi bekuvele kuzamangalisa ukuthi ibandla leANC lithonise amacala ebandla leZanu PF “njengoba lezi zimbila zantabanye.”

UMnu. Believe Gaule, okubandla leZanu PF, uthi lenze kahle ibandla leANC ngoba uhulumende kaMnangagwa kephuli amalungelo kazulu.

“Bonke labo abathi uhulumende kaMongameli Mnangagwa wephula amalungelo kazulu bangabathengisi. Abanye babo bejayele ukugijimele kwele South Africa befike beqambe amanga ngokwenzakala eZimbabwe.”

Inhlanganiso ezimeleyo eyeZimbabwe Lawyers for Human Rights ithi kulabantu abedlula amatshumi ayisithupha ababotshwa eZimbabwe kulandela imizamo yabo yokuqoqa ukutshengisela emigwaqweni ngoNtulikazi lonyaka.

Facebook Forum

XS
SM
MD
LG