amalinks wokungena

Breaking News

'Uzulu Ukhonona Ngobunengi Bamabandla Aphikisa eleZanu PF Azangena Kukhetho Oluzayo'


Amabandla aphikisayo edlula ikhulu kwele Zimbabwe.
Amabandla aphikisayo edlula ikhulu kwele Zimbabwe.

Annastacia Ndlovu

Abanye abantu eMatabeleland bathi bavela batshiywa phandle kwezombusazwe ilizwe leZimbabwe lisanda kuthola uzibuse kodwa balethemba lokuthi lokhu kungalungiswa nxa izabelo zingathola uzibuse.

Abakhulume lomsakazo weStudio 7 ngezombusazwe elizweni ngesikhathi kulungiselelwa ukhetho oluqakathekileyo, baveze ukuthi kuyethusa ukukhuluma ngalokho, ikakhulu ngesikhathi sokhetho.

Abanye ngabathi bayesaba ukulandelelwa ngabacuphi njalo lomongameli okhona okwamanje, uMnu. Emmerson Mnangagwa, kabakaboni ukuguquka kwakhe kuzolo yakhe embi abayesabayo.

Umkhokheli webandla leTransform Zimbabwe, uMnu. Jacob Ngarivhume.
Umkhokheli webandla leTransform Zimbabwe, uMnu. Jacob Ngarivhume.

Kodwa-ke abavule izifuba zabo bakubeke sobala ukuthi bazangathaba nxa izabelo zingaba lozibuse ngoba uhulumende webandla leZanu PF wababandlulula kusukela ngomnyaka ka1980.

UNkosazana Abigaile Mupambi, olwela amalungelo oluntu, uthi izabelo zeMatabeleland zazibeke ithemba kumabandla aphikisa elibusayo ukuthi azalisusa embusweni kodwa kukhanya engani konke lokhu akuhambi ngemfanelo.

Uthi manengi kakhulu amabandla aphikisa elibusayo okuzakwenza ukuthi behluleke ukususa embusweni ele Zanu PF.

Lokhu kugcizelelwe nguMnu. Mthobeki Ncube othi kabazizwa bekhululekile ngokungena kukaMnangagwa embusweni.

Abalandeli bebandla leZapu.
Abalandeli bebandla leZapu.

Abantu abanengi bathi kabakhululekanga ngaphansi kukahulumende kaMnangagwa okuthiwa waphatheka kakhulu kumbhuqazwe weGukurahundi ezabelweni zeMatabeleland leNkabazwe.

Bathi ibandla leZanu PF lokhe lingani lingaphansi kowayengumongameli uMnu. Robert Mugabe, owasuswa esikhundleni nguMnangagwa ebambisane lebutho.

Kodwa-ke abanye bathi amabandla aphikisayo yiwo angenzi kahle eZimbabwe.

UMnu. Wisdom Mkhwananzi uthi lokhe kwaba lamabandla aphikisayo akulanguquko abayilethayo ngaphandle kokuxabana bona ngokwabo abanye behlubuka kubandla elikhulu leMDC.

uNkosikazi Joice Mujuru ukhokhela umanyano weZimbabwe Rainbow Coalition.
uNkosikazi Joice Mujuru ukhokhela umanyano weZimbabwe Rainbow Coalition.

Kulabanye abantu abathi kuyethusa osokusenzakala emaphandleni lapho amalunga ebandla leZanu PF afuna ukuthi uzulu abanike amaphetshana okubhalisela ukuvota ama Biometric Voter Registration slips.

Abannye njalo bathi bahlalele evalweni nanko amasotsha ayiwo afaka uMnangagwa asekhona emakhaya bethi ukubakhona kwabo kubalalisa ubuthongo besela.

UNkosazana Mavis Ncube uthi akula lapho abangayamangala khona ngebutho elizulazulayo emaphandleni ngoba kuyilo njalo elibusayo.

Lokhu kusekelwe nguNkosazana Thandiwe Sibanda othi bathwele nzima ngoba akulazibuse kwele Zimbabwe.

Umumo wezombusazwe eZimbabwe awukabi lenguquko ebambekayo lokhe kungene uMnangagwa.

Amabhanga awalamali, akulamisebenzi, abantu lokhe benyamalala, abanye bayabotshwa mahlayana kuthi kwezombusazwe akucaci nanto ilizwe selilamabandla adlula ikhulu kungasi wonke azangena kukhetho oluzayo.

XS
SM
MD
LG