amalinks wokungena

Breaking News

Izizalwane zeZimbabwe Zisola Indlela Amabandla Aphikisayo Asebenza Ngayo


Ezinye izizalwane zeZimbabwe kweleSouth Africa sezisole kakhulu indlela amabandla aphikisayo asebenza ngayo eZimbabwe.

Inengi lisola kakhulu ukusweleka kombono lokwehluleka ukubambana emabandleni la ngesikhathi iZimbabwe ibhekane lesimo esibikakhulu kwezomnotho.

Bathi lamabandla akhombisa ukungakhuli lokungabi lendaba lezifiso zabantu beZimbabwe.

Inengi labeZimbabwe abahlala kweleSouth Africa bathi osekwenze indubo zeZimbabwe ziqhubekele phambili okweminyaka eminengi kangaka yikwehluleka kwamabandla aphikisayo, ukuqakathekisa izifiso zikazulu.

Isizalwane seZimbabwe umnumnzana Mlungisi Tshabalala uthi ukwehluleka kwamabandlala aphikisayo ukumanyana, kukhombisa khona ukuthi iziphathamandla zawo kazilandaba lezifiso zabantu kodwa zifunanje ukubasebenzisa ukuze zithole amandla okubusa.

Umqondisi wenhlanganiso elwela amalungelo oluntu eyePhoenix Foundation of Zimbabwe uMnumnzana Dumisani Nleya, uthi ingcazelo yokuxhophana okubonakala kulamabandla yikuthi iziphathamandla zawo ziyasetshenziswa.

UTshabalala yena uthi indlela iziphathamandla zalamabandla ezilwisanangayo, zibumba okungamaqenjana, akukhombisi ukuthi balalo ikhono lokubusa ilizwe.

Ngakwelinye icele uNleya uthi kuyamangalisa ukuthi kungani amaqembu aphikisayo engalayo inhlakanipho lombono osegcekeni wokuthi ukuze kube lenguquko eZimbabwe kudingeka wonke amabandla amanyane.

Leyinto egcizelelwa ngumnumzana Tshabalala yena othi sekufuneka amabandla aphikisayo alenkokheli ezingasizo magovu ombuso kodwa lezo ezizwa kuhela nxa zibona inhlupheko ebhekana labantu beZimbabwe.

UNleya yena uthi uzulu kakhohlwe aphinde ukuthi emabandleni akhona khathesi kungabakhona elizathatha intambo zombuso likhuphe iZimbabwe enhlutsheni ebhekane lazo. Uthi ibandla elizahlenga iZimbabwe, ngelitsha, elabantu abatsha, elingakazalwa.

Ngakwelinye icele inengi lithi okukhathazayo yikuthi okwamanje akukabingitsho lenhlansi eyisibonelo sokuthi, lelibandla elingakabikhona lizakubakhona.

XS
SM
MD
LG