amalinks wokungena

Breaking News

Abantu Bakhuthazwa Ukuthi Bavotele Abesifazana Kukhetho Oluzayo


FILE: Amabandla amanengi ezombusazwe amelwa ngabesilisa kukhetho lukamongameli olokudinga amalunga edale lephalamende lokunye okufanayo.

Ngesikhathi ukhekho lusondela eZimbabwe, abesifazana beZimbabwe kwele South Africa sebekhuthaze osowabo ukuthi basekele abanye babo abancintisa enkundleni ezitshiyeneyo kulolukhetho ukuze indingeko zabomama zibe labazimelayo engatsheni zonke zikahulumende kanye lasephalamende.

Abesifazana beZimbabwe abakhulume leStudio 7 kwele South Africa bathi abathandabuzi ukuthi ukungena kwabomama ezikhundleni okuzancintiswana kuzo emakhansilini, kuhulumende wezabelo, kunkokheli zelizwe kanye lasephalamende kungaletha inguquko osekuleminyaka engamatshumi amathathu lesikhombisa isehluleka ukufika.

Bathi okwamanje balutshwana omama abasezikhundleni kwezombusazwe okwenza kube nzima ukuthi inhlupho zabo ziphele njengoba abakulezo zikhundla bengazizwisisi ngoba kungayisibo bantu besifazana.

Abesifazana laba bathi inhlupho ezifana lokuhlukunyezwa ezindlini, ukuthathelwa impahla nxa omkabo sebefile, ukudlwengulwa lezinye zingaphela kuphela nxa omama bemelwe ngobunengi kusukela emakhansilini kuze kuyefika esikhundleni sikamongameli welizwe.

Isizalwane seZimbabwe, uNkosazana Teas Nkomo, owaziwa kakhulu kwezokulaya ulutsha ukungalahlekelwa yisintu salo, uthi okubakhathazayo njengabomama yikuthi nxa ukhangela ezikhundleni eziphezulu emabandleni ezombusazwe ungacina ucabanga ukuthi omama vele kabavunyelwa ukungena kuzo.

“EZimbabwe siyabafuna omama. Okokuqalanje iZanu ayilabo omama abayinkokheli. Amabandla aphikisayo abanabo omama kunkokheli yabo. Nalawa ama party akithi okuthiwa yiMthwakazi awanayo ileadership yabangomama. Yonke into yakhona ngabobaba first obaba first.”

Omunye wesifazana, uNkosazana Sibonginkosi Ndlovu, uthi kuyaphica ukuthi kungani emabandleni ezombusazwe amakhulu eZimbabwe kungakhulunywa ngomkhokheli ongumama, kodwa kuze kukhulunywe ngomama nxa sekufuneka umsekeli.

Uthi elizweni elinjengeZimbabwe lapho ngesikhathi sonke sokhetho kuvame ukuqhamuka udlakela, kudingeka inkokheli zesifazana ngoba zisenelisa ukutshengisa gcono uzwelo, ukuthula lesihelo nxa izinto zingasahambi kahle.”

Umama ulokucabanga ngenhliziyo ecolekileyo. Obaba balokuthatha ipolitics bayifake enhliziyweni yikho ubona isikhathi esinengi ma sebehlangene banokulwa, baze balwe nangezandla. Kungoba ubaba kafuni kuqondiswa. Kodwa ma singathola uPresident ongumama eZimbabwe ngibona engathi yikho lapha esingakhuphuka khona lathi sizokwazi ukuthi sibuyele ekhaya amathuba aziveze.”

UNkosazana Ester Sibanda yena ukhuthaza omama ukuthi nxa befuna ukukhokhela kwezombusazwe kumele basebenzise ukhetho oluzayo ukukhankasela ukunqoba kwabesifazana emabandleni atshiyeneyo.

Uthi akusizi ukuthi njengabesifazana bephiwe ithuba ekhethweni oluzayo baphinde bakhethe abesilisa bese kusasa bekhala ngokuthi akukho abanakayo.

“Siyasilela kakhulu kuhleli kungamadoda yonke into. Abesimame siyasilela kuyo yonke into. Abesimame si slowly kakhulu ezintweni zonke. Besifisa ukuba aluba kuyenzakala lathi siphathe something singene ephalamende. Lathi siphathe njengabantu besifazana sifake imbono engasiza elizweni.”

Selokhu iZimbabwe yathola uzibuse kayikaze ikhokhelwe ngumongameli wesifazana. Ibandla leZanu PF lalikhethe unkosazana Joice Mujuru njengomsekeli kamongameli kodwa kuthe ekuxotshweni kwakhe kwafakwa abasekeli besilisa. Kubandla leMDC lakho kuyafana. UNkosazana Thokozani Khuphe laye usebenze kuphela njengomsekeli kuthe ngesikhathi sekufanele aphathe okwesikhatshana kwabalengxabangxoza kwacina sekukhokhela owesilisa.

Udaba Esilethulelwe NguBenedict Nhlapho
please wait

No media source currently available

0:00 0:03:24 0:00

Facebook Forum

XS
SM
MD
LG