Lanxa ingcwethi kwezombusazwe, amagqwetha kanye lozulu bevumelana ukuba kulinyathelo elincomekayo ukuvumela ukusakazwa kobe kusenzakala emthethwandaba weConstitutional Court kumabonakude lebulenjini bokukhulumisana obeFacebook, lamukelwe ngemibono ehlukeneyo lelinyathelo.
UMnu. Tineyi Mukweva, umqondisi wenhlanganiso yamaqgwetha eye Abammeli Human Rights Lawyers, uthi liyancomeka inyathelo elithethwe ngumthethwandaba weConstitutional Court, ukutholisa uzulu ithuba lokuthi azibonele ngawakhe obekusenzakala ngoLwesithathu ngesikhathi kuthethwa udaba olukhwezwe ngabomanyano weMDC Alliance, bephikisa impumela yokhetho lukamongameli lukamhla ka 30 Ntulikazi.
UMukweva uthi lokhu kuzosiza ingcwethi kwezemithetho kwelakusasa.
Eyinye ingcwethi kwezombusazwe uNkosazana Similo Maphosa uthi lanxa kube linyathelo elihle elithethwe yiConstitutional Court, okunye abakubonileyo bekungajabulisi.
Uthi lendlela omahluli bebebuza ngayo kuhle kwaveza ukuba sinqumo bani uzulu azasithola okusuka kuphambane lenjongo yokuba lilizwe elilandela umbuso kazulu.
Lokhu kusekelwe nguMnu. Lindani Jama, isakhamuzi sePomona eHarare, othi akazinikelanga uhulumende ukulandela umbuso wentando kazulu.
UJama uthi lesinqumo esizakwethulwa ngoLwesihlanu asisoke sibe ngesisuthisa uzulu.
Kodwa omunye wabancintisa kukhetho lokudinga umongameli, uMnu. Peter Harry Wilson owe Democratic Opposition Party obesemthethwandaba, uthi udaba oluphakanyiswe ngabomahluli ukuba abe MDC Alliance baphuza ukukhweza udaba lwabo kungokunye okuzokwenza omahluli bahlulele ngendlela engasoke yathandwa nguzulu.
Idale lomthethwandaba weConstitutional Court lizakwethula isinqumo salo edabeni olwakhwezwa ngumkhokheli womanyano we MDC, uMnu. Nelson Chamisa, ophikisa ukuthi uMnangagwa wanqoba kukhetho lukamongameli.
UChamisa uthi ikhomishini yeZimbabwe Electoral Commissoon yaphekapheka amanombolo incedisana lebandla leZANU PF ukwenzela ukuthi uMnangagwa anqobe kukhetho lolu.
UChamisa ufuna ingaze yemukelwa limpumela ngoba uthi ulobufakazi bokuthi nguye onqobileyo iZanu PF iqhilibizele okwezinga laphezulu kulolu khetho.