Ilizwe leMelika lithi iyingcosana imali yenhlelo ezitshiyeneyo eyaphiwa eleZimbabwe esanda kwethulwa nguMnu. Mthuli Ncube kuluhlu lokusetshenziswa kwemali yelizwe – ibudget yomnyaka ozayo.
Lokhu kuvezwe nguMnu. Thomas Hastings, umsekeli womele eleMelika eZimbabwe, othi ilizwe lakhe lanika eleZimbabwe izigidi ezedlula amakhulu amathathu lamatshumi amathathu amadola - $330 million yenhlelo ezimbalwa lonyaka.
UNcube ubikele idale lephalamende ukuthi eleMelika lanika eleZimbabwe izigidi ezedlula amakhulu amabili lamatshumi amahlanu amadola lonyaka - $253 million yenhlelo ezitshiyeneyo.
Kodwa uHastings uthi ngamanga la ngoba baqhuba inhlelo ezigoqela olwe U.S. President's Emergency Plan for AIDS Relief kumbe PEPFAR, ezokuphandela abalambayo ukudla, ezokunceda abantu ababhekana lezulu lesiphepho uCyclone Idai lokunye.
Uthi kumele uhulumende weZimbabwe ahlolisise okwethulwe nguNcube okumele kubekwe emphakathini ngemfanelo.
Lokhu ngokwesibili ukuthi kubelohulumende okhonona ngokwethulwe nguNcube kubudget yelizwe yomnyaka ozayo.
EleChina lathi uNcube wethule okungayisikho ngoncedo olwaphiwa eleZimbabwe. Uthi imali eyanikwa eleZimbabwe ifika izigidi ezilikhulu lamatshumi amathathu lanhlanu - $136 million.
UNcube wabikela idale lephalamende ukuthi eleChina lanika eleZimbabwe uncedo olulesilinganiso semali edlula izigidi ezintathu zamadola - $3,6 million lonyaka.
Uhlangothi lukahulumende weZimbabwe olubona ngokwethulwa kwemibiko lwathi luzahlolisisa udaba lolu ukwenzela ukuthi kulungiswe okukhulunywa ngele China.
Kasenelisanga ukukhuluma leziphathamandla zikahulumende ngodaba lolu ngoba uMnu. Nick Mangwana, obona ngokwethulwa kwemibiko, loMnu. Mthuli Ncube, umgciningcebo kahulumende, bebengaphenduli omakhalekhukhwini wabo.
Ingcwethi kwezomnotho ezimele yodwa, uMnu. Rejoice Ngwenya, uthi kuyayangisa okwenziwa nguhulumende weZimbabwe.
Kusenjalo, uHastings ngoLwesibili wethekelele indawo zesigabeni seMaNdebeleni eziqhuba inhlelo eziphathiswa ngoncedo lwemali evela elizweni lakhe, phansi kwesikhwama sePEPFAR. UHastings wethekele izibhedlela ezigoqela Esigodini District Hospital leMpilo Central Hospital koBulawayo.
Ekhuluma esibhedlela seEsigodini, uHastings uthe kuyajabulisa ukubona imitshina yakulez’insuku isetshenziswa lemidala ekwelapheni abantu abaphila legcikwane lengculaza njalo ikuzinga lokulandela iziqondiso zamazwe womhlaba zokuphathwa kwabaphila lalesi simo.
Umqondisi wesibhedlela seEsigodini District Hospital, uDokotela Cleophas Kira Makonese, uthi basebenzisa kahle imitshina etshiyeneyo ukwenzela ukwelapha abahlutshwa yimikhuhlane eminengi.
