amalinks wokungena

Breaking News

EleBotswana Lithembisa Ukunikeza Izibotshwa Zakwamanye Amazwe Ama ARVs


Antiretroviral (ARV) drugs.

EleBotswana selivumile ukulandela isinqumo somthethwandaba ngokuqala ukunikeza izizalwane zakwamanye amazwe ezisamejele eziphila lengculaza, amaphilisi ama Anti-Retro Virals (ARVs), kulandela udaba olukhwezwe emthethwandaba yizizalwane zeZimbabwe ezimbili nyakenye.

KulabeZimbabwe abaphose befika amakhulu ayisikhombisa abaszintilongweni kwele Botswana.

Uhulumende weBotswana utshele uhlangothi olubona ngezamalungelo oluntu yomanyano wamazwe omhlaba eyeUnited Nations Human Rights Council ukuthi uzahlonipha isinqumo esethulwe ngumthethwandaba ukuthi abokuza abasemajele abaphila lengculaza baphiwe amaphilisi okwehlisa igcikwane emzimbeni, ama Anti Retro Virals (ARVs).

UNHRC
UNHRC

IBotswana itshele umhlangano we UNHRC Universal Peer Review eGeneva ngeviki elidluleyo ukuthi izalandela izinqumo zomthethwandaba, ngemva kokuba ababili abeZimbabwe abasejele kweleBotswana, baphanyeke udaba lokuthi kumele baphiwe ama ARVs.

IBotswana ithi zonke ingatsha eziphathelene lodaba lokunikeza ama ARVs abokuza abasemajele, sezazisiwe, ngakho kukhangelelwe ukuthi zilandele lesisinqumo.

Ekuqaleni iBotswana yayithe ayilamali yokunikeza abokuza abasemajele ama ARVs kodwa umthethwandaba wathi ukubancitsha kufana lokubanikeza isigwebo sogodo.

Isinqumo sikahulumende weBotswana sokuthi angaphikisi ukwahlulwa okwenziwa ngumthethwandaba, samukelwe ngenjabulo ngabanye abeZimbabwe abaseBotswana.

UNkosikazi Sipho Tshuma uthi inyathela leli lizanceda abaphila legciwane lengculaza elisemajele.

“Kuyabongeka okwenziwe nguhulumende, ikakhulu sikhangele abakithi abavela eZimbabwe, kuzabanceda kakhulu.

Amaphilisi ama ARV's
Amaphilisi ama ARV's

UMnu. Mthabisi Dube laye uthi okwenziwa nguhulumende weBotswana kuqondile, ngoba ukuba sejele akutsho ukuthi abantu kumele bayekelwe bafe.

"Ngibona kuyinto enhle ukuthi baphiwe ama ARVs ngoba ukufaka umuntu ejele akusiso sigwebo sokufa, ikakhulu uma umuntu elomkhuhlane wengculaza. Indaba le ike yahlupha emninyakeni esanda kudlula, ngakho kuyinto enhle eyenziwa nguhulumende."

Kodwa omunye oweZimbabwe ubona lelinyathela ngelinye ilihlo esithi lifana lokupha umuntu owinileyo umvuzo.

"Uze kwele Botswana wenza icala … iBotswana izakupha ukudla ibuye ikuphe ama ARV, ekhaya ngitsho ungaphandle awutholi amaARV mahala."

Uthi noma nje lolukuludaba lwamalungelo oluntu, kumele kukhunjulwe ukuthi amaphilisi ama ARVs ayadula, esithi inyathela leli lilakho ukukhuthaza abangabe begula ukuthi badale amacala ngabomo.

Imithi yamaAnti-retroviral (ARV)
Imithi yamaAnti-retroviral (ARV)

“Kungezakala ukuthi umuntu adale icala elincane ngabomo, eyengena ejele, isikhathi esincane athole amaphilisi umzimba ubengcono, umuntu abesebuyela ekhaya."

Uhulumende weBotswana, okwabonwa njengendlela yokubalekela ukunikeza abokuza abasemajele ama ARVs, wabika ukuthi seqale ukukhulumisana lohulumende weZimbabwe ukuze abasemajele bebuyele bayeqedisa isigwebo sabo kibo.

Inombolo ezakhitshwa nyakenye zatshengisa ukuthi kulabeZimbabwe abaphose babengamakhulu ayisikhombisa (688) abasemajele eBotswana, beyibo abakunani eliphezulu kuzizalwane zakwamanye amazwe.

Udaba lokuphiwa kwezibotshwa amaARV's kwele Botswana siluphiwa nguMartin Ngwenya
please wait

No media source currently available

0:00 0:03:30 0:00

Facebook Forum

XS
SM
MD
LG