amalinks wokungena

Breaking News

Badlana Ingqondo Abantu Ngokungethulwa yiConstitutional Court NgoLwesihlanu


UMnu. Tinomudaishe Chinyoka, igqwetha lebandla leZanu PF.
UMnu. Tinomudaishe Chinyoka, igqwetha lebandla leZanu PF.

Izakhamizi zedolobheni leGwanda seziveze imbono etshiyeniyo ngodaba lweConstitutional Court obelusemthethwandaba ngoLwesithathu.

Loludaba lokhu lusegudwini njalo inengi lokhu lixoxa ngalo ikakhulu ebulenjini bokuzilabazise. Izakhamizi ezixoxe lalumsakazo emajahundeni ziveze imbono etshiyeneyo zisithi zimelela ngamehlo abomvu isinqumo esizethulwa ngumthethwandaba ngoLwesihlanu.

UMnu. Balugwe Moyo ocubungula ngezombusazwe uthi loludaba luyinsindabaphenduli.

“Ngokubona kwami uChief Justice ubelemphicambuzo eminengi kumeli weMDC Alliance kodwa yaba milutshwane kubameli beZanu PF labe ZEC.Kodwa ngakolunye uhlangothi uyigwazile umfokaMpofu, hayi ke ukuthi iyozala nkomoni kusenzima kathesi, ingaxakela ingaphunza.”

UNkosazana Lungile Masuku oyisakhamuzi seGwanda uthi ngokubona kwakhe umanyano weMDC Alliance wehlulekile ukuletha ubufakazi obugcweleyo obugoqela ama V11 forms asetshenziswa kulolukhetho.

“Ngokubona kwami ukuswelakala kwe evidence ebikhulunywa kakahulu yonaleyo eyama V11 forms kuzadala ukuthi iruling yakusasa iverdict ezaphuma iphume isekela iZanu PF ngoba behlulekile ukuthi bathi baveze ama V11 forms.”

Igqwetha likaChamisa uAdv. Thabani Mpofu uthe bebengeke bayavumbulula imvuthuluka zokhetho esithi lokhu bekuzafana lokunatha emthonjeni oletshefu esithi imfulo yendaba isemangeni ethulwa yikomishini ebona ngokhetho eyeZEC ephethe iguqula impumela yokhetho lukamongameli.

UMnu. Sifanjani Bhebhe uthi bekungasoze kusize ukudinga ubufakazi bamabhokisi asezandleni zeZEC.

“Ubufakazi akade bekufuna ngobamabhokisi aweZEC abawakhiyeleyo bona abakwaziyo lapho ahlala khona ukuthi sebafakani phakathi kwayo bayabe besithi uChamisa awathathe nga.Noma singakayiboni ijudgement siyazi ukuthi izabuya ifavour uMnangagwa sikhuluma nje lathi singafundanga sikhangele sibona ukuthi vele amanzi la agelezela nga njalo athinthwa ukuthi kumele aqonde nga ngenkani.”

Loba nje inengi ngoLwesithathu belithe nhlo amehlo kumabonakude njalo lithiye indlebe emsakazweni weZBC inengi emaphandleni elifana loMnu. Ngqabutho Ndlovu lizwe loludaba ngelikabathi.

“Ngapha ngemakhaya abantu abanengi bajayele ukulalela umsakazo weStudio 7 iradio Zimbabwe ilokuhlupha kakhulu iyabe sifuna ufake ama aerial amade ukubamba kwakhona kuba nzima so abantu abanengi izolo badane kakhulu basincede sibili balungise ukuze lathi sithole I information yokuthi kuyini okwenzakalayo phezulu khonangale abantu bonke behlale bekwazi.”

Idale leConstitutional Court likhangelelwe ukwethula isinqumo ngaloludaba ngolweSihlanu emini njalo lesosinqumo kasisoze saphikiswa yiloba ngubani.

Kusenjalo, umanyano wenkonzo zokholo lwesikhristu oweZimbabwe Christian Alliance uthi uyaqhubeka ngokukhuthaza ukuthi kubelokuthula elizweni kulandela ukhetho olwedluleyo, olulempumela ephikiswe ngumanyano weMDC Alliance emthethwandaba weConstitutional Court izolo.

Isiphathamandla seZimbabwe Christian Alliance, uMnu. Useni uthi abafundisi basebenza lenkokheli zomdabu ezigabeni zabo ngaloludaba.

XS
SM
MD
LG