amalinks wokungena

Breaking News

Abantu Bakhathazwa Yikubotshwa Kwabezombusazwe Abanganikwa Ithuba Lokuhlawula Isibambiso seBail


UNkosazana Joana Mamombe loNkosazana Cecilia Chimbiri

Abalwela amalungelo oluntu bayakusola ukubotshwa mahlayana kwabezombusazwe labalwela uzulu ngales'isikhathi ilizwe libhekane lobhubhane lweCOVID-19.

Bathi njalo lokhu yikwephula ilungelo lalabo bantu lokubafaka engozini yokuthapha lumkhuhlane.

Lokhu kuza ngesikhathi umantshi eHarare, uMnu. Standford Mambanje, eyalele iziphathamandla zebandla leMDC Alliance, uNkosazana Joana Mamombe loNkosazana Cecilia Chimbiri, ithuba lokuhlawula imali yesibambiso sebail.

Ensukwini ezisanda kwedlula, umsekeli womgcnisihlalo weMDC Alliance, uMnu. Job Sikhala, isikhulumeli sebandla leli uNkosazana Fadzai Mahere, intathelizindaba esebenza izimele uHopewel Chin’ono labanye ababotshelwe amacala ehlukeneyo, labo balelwe ithuba lokuhlawula sibambiso sebail.

Owake waba ngumphathintambo wezempilakahle, uDokotela Henry Madzorera, uthi kuyingozi okwenziwa ngabezomthetho abafaka izibotshwa okwesikhathi eside entolongweni lapho okungela mpahla yokuzivikela kuCOVID-19.

“Kumele bayilandele labo leyo mithetho abasibekela yona ngoba singacina sesilenkinga elizweni. Kasifuni nkinga thina, akekho esifisa ukuba alahlekelwe ngumphefumulo. Sifuna wonke umuntu ephila ekupheleni kwalo lolubhubhane.”

Isikhulumeli sohlangothi lwabasakhulayo kuMDC Alliance, uOstallos Gift Siziba, uthi akasiboni isizatho sokwalela abantu ukuba behlawule isibambiso sebail.

UMnu. Witness Dube, isikhulumeli seMDC-T, uthe kabakasihlolisisi isinqumo sikamantshi ngakho-ke bangeke bethule umbono ojulileyo ngalokhu.

“Okwesibili yikuthi nje asifuni kugxamukela emsebenzini wabogatsha lwemithetho ngoba kuqakathekile ukuthi ipolitiki ihloniphe umthetho layo kungabi sengathi sibona ipolitiki njengenkunzi okuthiwa kayibotshwa. Kodwa esikwaziyo lathi njengozulu wonke weZimbabwe yikuthi lomuntu obulele umuntu uyabhadaliswa imali yesibambiso sebail ukuze athonisiswe engaphandle.”

Ababili laba khona bezomiswa futhi phambi komthethwandaba mhlaka 13 Mbimbitho kodwa igqwetha elibamelayo, uMnu. Charles Kwaramba wenhlanganiso yamagqwetha alwela ilungelo loluntu eyeZimbabwe Lawyers for Human Rights, uthi bayasiphkisa les’isinqumo.

Omunye wabake babotshwa kunsukwana ezisanda kwedlula, uNkosazana Mahere, utholakale esele COVID-19 ekuphumeni kwakhe entilongweni kulandela ukwelelwa kwakhe ukuba ahlawule isibambiso sebail.

Facebook Forum

XS
SM
MD
LG