amalinks wokungena

Breaking News

Bamtshele Zagcwala uMnangagwa Ethanyela Ingcekeza Phambi Kwabantu Abalambileyo


UMongameli Emmerson Mnangagwa ngesikhathi ephendulana labantu eKuwadzana ngoLwesihlanu.

Abantu abathi babhekane lenhlupho ezinengi eZimbabwe ngoLwesihlanu bamtshele zagcwala uMongameli Emmerson Mnangagwa ngesikhathi ethanyela izibi eKuwadzana eHarare.

UMnangagwa, obeqhuba uhlelo lwakhe lokuthanyela izibi emigwaqweni, uzame ukuvika ngokukhulumisana labantu abazondileyo wacina esithi nxa belamba kumele badle umbhida.

Abantu akade besendaweni leyo bamtshele ukuthi kabalamali yokuthenga ukudla okugoqela inyama kanye lengwalo zabantwana besikolo.

UMnangagwa uqhubeke ezama ukuvika amazwi abantu esithi ulakho ukuthi izikolo zehlise inhlawulo yama school fees.

Abanye bamtshele ukuthi alungise lodaba lwabodokotela abakhalala umsebenzi kulokuthi aqhubekele phambili ethanyela emigwaqweni.

Ekhuluma kulumbuthano uMnangagwa ukhuthaze abakade baklabalala okutshiyeneyo ukuba bame ukudla inyama ethi odokotela bathi kayilungelanga impilakahle.

“Lifuna inyama? Imibhida ke? Odokotela bafuna lidle imibhida ukuze lihlale lingabantu abaphililelyo. Inyama ayilunganga bantu. Mina ngilalela odokotela yikho ngizidlela imibhida.”

Ingcwethi ecubungula ezombusazwe, uMnu. Mlungisi Dube, uthi okwenzakale ngoLwesihlanu kuveza ukuba uzulu uthwele nzima kungakho usezimisele ukuthatha loba yiliphi ithuba ukumazisa umongameli.

“Ukubana kube labantu abakhale ngalokhu, kumele ukuthi nxa uMnangagwa ehlakaniphile abone ukuthi indlela zimbi. Kuzakuba nzima ukuba abuse abantu abalambileyo, kungenza ukuba bagenqule umbuso wakhe, kananzelele.”

Lokhu kusekelwe ngu Mnu Nqgabutho Mabhena owebandla le Zimbabwe Communist Party yena othe njengebandla lokhu kutshengisa ukuba ilizwe sokumele libe lenkulumo ezibambekayo ukulungisisa indubo zikazulu.

“Lokhu okwenzakele ku Monagmeli Emmerson kutshengisa ukuthi abantu eZimbabwe balambile, behluleka ukuhambisa abantwana esikolo. Selokhu wangena embusweni useyehlulekile ukulungisa umnotho. Thina sithi umonagmeli kumele abize iNational Economic Dialogue nxa efuna ukwakha ilizwe.”

Abasekeli bebandla leZANU PF akade bekuhlelo lolu bathi ukukhulumisana labantu okwenziwe nguMnangagwa kuveza sobala ukuthi ungumkhokheli olalela izikhalazo zabantu kungakho uzalungisisa izikhalazo lezi.

UMnangagwa Uthi Kumele Abantu Bedla Umbhida
please wait

No media source currently available

0:00 0:03:19 0:00


Facebook Forum

XS
SM
MD
LG