amalinks wokungena

Breaking News

IZIMRA Ithathela Abantu beZimbabwe Abangene Kwele Botswana AmaBond Notes


Zimbabwean Bond Notes
Zimbabwean Bond Notes

Izihambi eziphuma eZimbabwe zingena emazweni afana leBotswana leSouth Africa zithi abohlangothi lweZimbabwe Revenue Authority (ZIMRA) bayabakhuthuza bedinga imali yohlobo lwama bond notes, ukuthi ingaphumi elizweni, ngesikhathi kusilela imali emabhanga.

Abohlangothi olubona ngokubuthaniswa kwemali kahulumende emngceleni etshiyeneyo yelizwe, abe ZIMRA, babikwa bekhuthuza abaphuma elizweni bedinga imali yohlobo lwama bond notes, emizameni yokulwiswana lodubo lokuswelakala kwemali eZimbabwe.

Abaphuma elizweni lokhe kudlule ukhetho, bathi abeZIMRA sebeqinisa umsebenzi wokukhuthuza izihambi, kudingwa imali yamabond notes.

UNkozikazi Emily Tshuma uthi kukhanya kulokuqiniswa komkankanso wokudinga ama bond notes, ngemva kwembiko nyakenye ethi imali enengi yohlobo lolu, ingena emazweni angomakhelwane afana leSouth Africa, Mozambique, Botswana kanye leZambia.

“Kuyasetshwa ebhoda okuzwayo. Omama yibo abasetsha izihambi ezingomama, kunjalo lakubobaba. Kuthiwa akulamali yeZimbabwe okumele idlule emngceleni, noma nje singakwazi ukuthi isiwa ngaphi.”

Esinye isihambi esisanda kungena eBotswana sithi ukudinga ama bond notes emngceleni ayisikho okungakhipha iZimbabwe enkingeni yokuswelakala kwemali.

“Akuqakathekanga kangako ukugijimisa imali ephumayo. Okuqakatheke kakhulu, yikulungisa umumo womnotho, ozakwenza ukuthi kube lemali elizweni. Siyabona amanye amazwe, imali zabo ziyaphuma elizweni ngobunengi, okufana lamaPula, idola leMelika kanye leRand, kodwa asikaze sizwe amazwe la ekhonona ngokusilela kwemali.”

UMnu. Rodwell Moyo uthi noma ama bond notes ephuma elizweni, ekucineni kwelanga azaphenduka elizweni, ngoba asiyohlobo lwemali olungasebenza kwamanye amazwe.

“Siyakhatheza ngokukhuthuzwa, ngoba ibond note yiyo esisebenza ngayo ukuyawoda. Ekugcineni kwelanga ibond note liyaphenduka ekhaya. Abantu abathathelwa ibond note ngabaphila ngalo, manje bazaphila njani uma sebelithathelwa.”

Ibhanga leReserve Bank of Zimbabwe nyakenye libike ukuba udubo lokusilela kwemali lubangwa yikuthi ama bond notes amanengi ayaphuma elizweni engena komakhelwane.

Ngesikhathi imisebenzi isilela eZimbabwe, abanye, ikakhulu intsha, isiphila ngokuthengisa imali emgceleni efana lePlumtree kanye leRamokgwebana, lemadolobheni afana leFrancistown leGaborone.

Abanye sebethole ubhizimusi ikakhulu ekuthengiseni ibond note ledola leMelika.

Udaba Esilethulelwe NguMartin Ngwenya
please wait

No media source currently available

0:00 0:02:45 0:00

XS
SM
MD
LG