amalinks wokungena

Breaking News

Izinduna Zivotela Ukuthi Kususwe uNhlanhlayamangwe Ndiweni Esikhundleni


Induna uFelix Nhlanhlayamangwe Ndiweni

Ezinye izinduna esabelweni seMatabeleland North, ikakhulu ezidabuka eBinga, sezivotele ukuthi induna uFelix Nhlanhlayamangwe Ndiweni asuswe esikhundleni.

Zivote emhlanganweni weMatabeleland Provincial Assembly of Chiefs namuhla ukuthi uNdiweni amiswe umsebenzi.

Izinduna ezikhulume lomsakazo weStudio 7 zithe kulenduna ezidabuka eBinga ezingamakhulu phose angamatshumi amabili phakathi kwezifika amatshumi amane ezivotele ukuthi uNdiweni asuswe esikhundleni zisithi kakhethwanga ngemfanelo.

Kodwa ezidlelana lobukhosi benkosi uLobengula kaMzilikazi kaMatshobane zithi uNdiweni kayindawo.

“Lokhu ngamanyala. Asikuvumi ngitsho lakancane okwenziwe zinduna lezi ezidabuka eBinga inengi lazo ezingakwaziyo lokuthi umuntu ugcotshwa njani ukuba yinduna. Sizakulwa ngamandla ethu wonke ukuthi uNdiweni ahlale esikhundleni sakhe. Lokhu kuveza ukugcola kukahulumende okhanya engazwanani lakho konke okwenziwa nguNdiweni,” kutsho eyinye yezinduna ecele ukuthi singavezi igama layo.

Kasenelisanga ukukhuluma ngodaba lolu lenduna ezidabuka eBinga, uNdiweni lezinduna ezikunhlanganiso yeNational Chiefs Assembly okuyiyo ezaphanyeka udaba lolu kumphathintambo obona ngezamasiko, uMnu. July Moyo.

Sehlulekile njalo ukuxoxa ngalokhu loMoyo ozakhulumisana loMongameli Emmerson Mnangagwa ngokwethulwe yinhlanganiso yeMatabeleland North Provincial Assembly of Chiefs.

Isahluko 283 sombuso welizwe leZimbabwe sithi induna ingasuswa esikhundleni nxa iProvincial Assembly of Chiefs ingathatha isinqumo sokuthi isuswe esikhundleni.

Izinduna ezinengi zithi kubi lokhu okwenziwe zinduna ngoba uNdiweni uyaziwa ukuthi uphikisa uhulumende kaMnangagwa.

UNdiweni ukewavalelwe entilongweni kulandela ukugwetshwa kwakhe kudaba lokuthi wancedisana lezinye izakhamizi wadiliza izakhiwo zeyinye indoda eNtabazinduna eyeyibambe ikhosikazi layo lilele leyinye indoda kodwa ababili labo bayala ukuthi umama lo ayelaywa kubozalwa.

UNdiweni ukewaphuma kumabonakude esithi uhulumende kaMnangagwa uziqhuthele hatshi ukuthi umnotho welizwe ubhidlizwa yizijeziso zenotho ezafakelwa inkokheli yebandla leZanu PF ngamazwe entshonalanga.

Facebook Forum

XS
SM
MD
LG