Obelwela amalungelo oluntu uBekezela Maduma Fuzwayo ubekiwe ngoMvulo edolobheni leGwanda lapho inengi elimchaze njengendoda emadodeni.
UMaduma obhubhe ngoLwesine ngeviki edlulileyo ukhulelwe ngumkhuhlane weCovid 19.
Bonke abakhuluma emngcwabeni kaMaduma bamchaze njengendoda ebilesibindi njalo izinikele ekuthuthukiseni impilo kazulu wesigabeni sakhe lelizwe lonke jikelele ngokubona ukuthi amalungelo oluntu ayahlonitshwa.
UNkosikazi Sithembile Khumalo ubabakazi kaMaduma okhulume emele umdeni uthi badabukile kakhulu njengemuli.
“UBekezela uhlalile phakathi kwenu limbonile, engumntwana obethobekile engumntwana obephangisa ukwenza izinto thina silahlekelwe koFuzwayo siyabonga uNkulunkulu osesithethe kwaze kwabalapha siyathandaza ukuthi avuse omunye uBekezela ozakuma angene ezicathulweni zikaBekezela agijime agcwale yonke indawo silusizi thina abakoFuzwayo.”
Umtanakhe uDenzel, laye okhulume kulumngcwabo, uchaze uyise njengomuntu obelothando.
“UMaduma yayindoda ebithanda izihlobo zayo. Akulandawo lapho uMaduma abesizwa kuthiwa kulohlupho engahambi khona, ukuhamba kukaMaduma kusizwise ubuhlungu kakhulu abantwabakhe sibili silahlekelwe asisela omunye ozasinika uthando akade sizaluphiwa nguMaduma kodwa sithembile ukuthi lapho akhona ubaba usendaweni engcono kulaleyi akade ekiyo.”
UMnu. Bethany Ndlovu, isakhamuzi saseGwanda, utchaze uMaduma njengendoda ebikhaliphile.
“UBekezela ubelobuchopho obedlula iminyaka yakhe yokuzalwa ubebanzi njengomzimba wakhe engqondweni yakhe , uBekezela was very brave ubengesaba ubesazi ilungelo lakhe ubengala kuthi lo ngubani, uBekezela kithi yiHero.”
Lawa mazwi agcizelelwe nguMnu. Thandeko Zinti Mnkandla, owake waba nguMeya weGwanda, othi imisebenzi kaMaduma idale ukuthi ayazakale elizweni lonke jikelele.
“UMaduma ubezigqaja ngokumela amalungelo abantu, eHarare bebemazi, koMutare bebemazi koBulawayo bebemazi, amapholisa bebemazi amaCIO kuPresidents Office bebemazi kodwa konke lokhu akuzange kumthelele uvalo, uMaduma singakhuluma ngaye kuse ngoba ebesehlanganisweni ezinengi nxa sigoqela konke sithi ubeyindoda emadodeni.”
UNkosikazi Bridget Ncube, owenhlanganiso yeResearch Advocacy Unit, uthi inhlanganiso ezizimeleyo zilahlekelwe kakhulu ngokubhubha kukaMaduma.
“He was a good advisor ukuthi singathi maduma silent enjoy esifisa ukuyiyenza ubesicebisa kuhle asitshele ukuthi yikuyini esingakwenza yini okungamelanga sikwenze u2021 uyaqalisa yikuyini esizakwenza siza advisor ngubani?”
UMnu. Molvin Dube, owenhlanganiso yezakhamizi eyeGwanda Residents Association. uthi uMaduma obengunobhala jikelele walihlanginiso udlule elokhu elwela inhlalakahle yezakhamizi zalelidolobho.
“Wenze umsebenzi omkhulu eGwanda sesikhangelele abahlali beGwanda, ebelwisa ukuthi iMunicipality ithathe over iplant leyana eyamanzi unfortunately isitsha esihle kasidleli.”
UMaduma wathola isicoco sokulwela amalungelo oluntu ngomnyaka ka2014 lo2016 eseZimrights National Human Rights Defender kunanzwa imisebenzi yakhe yokulwela amalungelo oluntu.
UMaduma ungcwatshwe edolobheni leGwanda njalo utshiye abantwana abathathu.