amalinks wokungena

Isimo Esibi Somnotho weZimbabwe Sesibhidliza iBinga Center


Inhlanganiso yeBinga Craft Centre ibhekane lobunzima bokusebenza kahle ngenxa yokuma manzonzo kwezomnotho welizwe osekungezelelwe yikwehla kwenani lezethekeli endaweni le.

Inani lamalunga kule indawo lehlile lisuka kunkulungwane ezimbili elaliletha imisebenzi yawo yezandla ukuba izothengiswa kodwa sokusele amalunga angamakhulu amahlanu kuphela.

Ukubaza lokukuthunga ilala bekuphilisa imuli ezinengi eBinga kodwa ukumamanzonzo kwezomnotho sokutshiye imuli ezinengi zisendlaleni ezinye zithengisa impahla zazo ngemali ephansi kumbe bethengisa ngokudla lempahla ezindala osekubangele ukuba lohlonzi lwempahla ezithungwayo lezibazwayo lwehle.

Umqondisi weBinga Craft Centre, uMnu. Matibbeki Mudenda, uthi lokhe kwaqala ukusebenza imali zakwamanye amazwe, ukusebenza kwendawo yabo kwehla kakhulu.

Kunje uthi balalesikwelede esikhulu kukhansili, eZESA laseTelOne. Ukufinyelela kwamanye amalunga eBinga Craft Centre sekunzima ngoba lenyawo ezilula azisekho kuthi lenani lezisebenzi selayehla ngoba kungela mali engenayo osekusehlula lokuyathengisela kwamanye amazwe.

Omunye osebenza eBinga Centre njalo eseluka ilala, uNkosazana Viola Mwembe, uthi abathengi sebebalutshwana njalo lokuyavuna ilala sokunzima.

Ucele ukuba uzulu kumbe inhlanganiso ezizimeleyo zibasize ukuze benelise ukuthola inyawo ezilula ezizabenza bayefinyelela kwamanye amalunga lokuvuna kuhle ilala.

Indlu yokusebenzela lokuthengisela eBinga Craft Centre isinetha, kuthi amanzi logetsi sekwavalwa ngenxa yesikwelede.

Izisebenzi ezikhona ngezizinekele ukusebenza kungelaholo. Imuli ezinengi ezaziphila ngokuthunga lokubaza sezibhekane lokuswela ngoba ibhizimusi isimi manzonzo.

IBinga Craft Centre ayisenelisi ukuyathengisa ngesikhathi impahla kwamanye amazwe ngoba sebesehluleka ukuba lokuthungwayo loba okubazwayo okulohlonzi.

Facebook Forum

XS
SM
MD
LG