amalinks wokungena

Breaking News

Amabandla Aphikisa iZanu PF Athi Kumele Luqhubekele Phambili Uhlelo LweBVR


Balutshwana abantu asebebhalise amagama abo kugwalo lokuvota. (S. Mhofu/Sept. 2017)

Amabandla aphikisayo athi uhlelo lokubhlisela ukuvota kumele lungezelelwe isikhathi ukuze lufinyelele wonke umuntu lalabo abavela phandle kwelizwe abafika elizweni ngesikhathi sekhefu le Khisimusi.

Lokhu kulandela imibiko eveza ukuthi sokubhalise abantu abalutshwana kakhulu, ikakhulu koBulawayo kugwalo olutsha lokuvota.

Inhlanganiso ebona ngezokhetho eye Zimbabwe Electoral Commission (ZEC), ithi isibhalise amagama abantu bazinkulugwane ezingamakhulu amane, 409 389, lenkulungwane koBulawayo, okulinenani eliphansi kakhulu kulabo kade bekhangelelwe ukubhalisela, kuthi ilizwe lonke sebedlule kancane izigidi ezine (4 million).

Umkhankaso wokubhalisela ukuvota uyagqhitshwa mhlaka 19 Mpalakazi kodwa uzulu uzaqhubeka ebhalisa amagama abo kuluhlu lwabavoti emahofisini eZEC. Embikweni okhitshwe yiZEC inani labantu eselibhalise koBulawayo lilokhe lingaphansi kwengxenye ekhangelelwe ukuthi izabhalisa ukuvota.

UDistrict Elections Officer wakoBulawayo, uNkosikazi Sithokozile Khuphe, uthe laloba inani lilokhe liphansi sebefake imizamo eminengi yokuthi bahuge abantu ukuthi babhalise ukuvota kukhetho lomnyaka ozayo.

NgoMvulo koBulawayo amabandla aphikisayo awe MDC, le MDC-T lebandla elibusayo ele Zanu PF, abesemhlangagweni leziphathamandla zeZEC becubungula ukuqhutshwa kohlelo lokubhalisa lolu olwe BVR ezabelweni ezintathu ezeMatabeleland.

Udaba Esilethulelwe nguBathabile Masuku
please wait

No media source currently available

0:00 0:03:35 0:00

Exoxa leStudio 7 unobhala jikele webandla leMDC-T, uMnu. Douglas Mwonzora, uthe njengamabandla aphikisayo bavumelane ukuthi uhlelo lolu kumele lwengezelelwe ngamalanga angamatshumi ayisithupha ukuze abavela ngaphandle kwelizwe benelise ukubhalisa.

UMwonzora uthi uhlelo lokubhalisa ukuvota aluqhutshwanga kuhle ezabelweni ngenxa yokuthi izifundo zokuvota azenziwanga kuhle njalo abanye abantu babengela maphepha okubhalisa.

Evumelana lo Mwonzora uMgcinisihlalo webandla le MDC ekhokhelwa ngu Proffessor Welshman Ncube ko Bulawayo, uMnu. Oscar Ncube, utshele uzulu ukuthi uhlelo lokubhalisa ukuvota kumele lwengezelelwe isikhathi.

UNcube ugcizelele wathi ibandla leZanu PF likhuthazwe njalo lavuma ukwekela ukuthatha inombolo zephepha lokubhalisa ukuvota, ama serial numbers ngeSilungu.

Olwela amalungelo oluntu uNkosikazi Jenny Williams ukhuthaze uzulu ukuthi ayebhalisa ukuvota ukuze kutshitshwe uhulumende we Zanu PF kukhetho oluzayo.

Umhlangano lo ubuhlanganisa amabandla amathathu alabameli edale lephalamende njalo umlandu wawo ubungowokulungisisa imithetho ekhangele ezokhetho. Uhlelo lokubhalisa ukuvota lukhangelelwe ukuqqitshwa mhlaka 19 Mpalakazi 2017.

Facebook Forum

XS
SM
MD
LG