amalinks wokungena

Breaking News

Uhulumende Uthi Uselungisa Ingwalo Zokuzalwa Lokunye Zabalezihlobo Ezabulawa Ngombhuqazwe weGukurahundi


Indawo okwabulawa khona abantu ngesikhathi sombhuqazwe weGukurhundi.

Abogatsha lwendaba zasekhaya bathi abohlangothi lukamabhalane omkhulu kahulumende, uRegistrar General, sebezasungula uhlelo kululungisa ingwalo eziqakathekileyo zabalezihlobo ezabulawa ngesikhathi sombhuqazwe weGukurahundi.

Bathi abaphazanyiswa ngumbhuqazwe weGukurahundi bazalandwa eziqintini ezehlukeneyo zelizwe, phansi kohlelo lweMobile Registration.

Lokhu kuvezwe ngunobhala wogatsha lwendaba zasekhaya, uMnu. Aaron Nhepera, ngesikhathi esipha ubufakazi kuKhomidi yedale lePhalamende ebona ngezomvikela, ezenzakala elizweni lokulondolozwa kwelizwe, kuyonale iviki.

“Umhlangano ongenwe yiziNduna zasemaNdebeleni, koBulawayo kusukela mhla ka 3 kusiya kumhla ka 4 Mpandula 2021, waveza ukuba loludubo lokwehluleka kwabantu ukuthola incwadi eziqakathekileyo, lukhona lasesigabeni saseBinga. Uhlelo lweMobile Registration luzokuyasiza abantu lakulezo ndawo.”

Kodwa unobhala wenhlanganiso elwela ilungelo loluntu eye-Ibhetshu LikaZulu, uMnu. Mbuso Fuzwayo, uthi ukhathazwa yikuthi aziphelelanga indawo ezibethwe nguNhepera.

“IMidlands yindawo eyonakala kakhulu. Mina ngikholwa ukuthi kuqakathekile ukuthi beyebuza uEmmerson loChiwenga ukuthi kanti badiploya abantu ngaphi. Ngoba yibo abantu ababekhona, abakhona, ababekhona ngaleso sikhathi njalo ababelomlandu omkhulu. UChiwenga wayengu One Brigade Commander, so ngibona engazathi bayakwazi ukuthi abantu babadiploya ngaphi. Kodwa uma sekulungiswa sekutshiywa elinye icele, ngibona engazathi lokho kuyatsho ukuthi kukhona abakuvalayo ngoba eMidlands kuyabe kukubonisa ukuthi kwakuyinto yokudiliza umhlobothize.”

Kuthi uMnu. Victor Dube, ohlala eBudiriro eHarare, uthi lanxa kuluhlelo oluncomekayo, kwakumele lwenziwa kudala.

“Ngabe kwenziwa ngezikhathi laphana abathu bekhala ukuthi zamanini sibili ukuthi lathi lisitholise ama-Birth Certificate. Yikuthi yena uhulumende wayefihla ukuthi kwabulawa abantu. Khathesi nxa sebesenza njalo, bazathini ngabantu, ngoba unganika umuntu i-Birth Certificate, ezakhuluma ukuthi uyise wafa kumbe umama wafa ebulawa yimpi yona leyo, lizakuthini ngomuntu wakhona?. Ngoba kuyabe sekufunakala ukuthi bedingisise ukuthi kwahamba njani ukuthi umuntu lowo aze abhubhe.”

UMnu. Bekezela Gumbo, owenhlanganiso ecubungula ezombuso eyeZimbabwe Democracy Institute, uthi lelinyathelo yindlela yokusondeza abantu duzane ngesikhathi ilizwe selilungiselela ukhetho luka 2023.

“Abantu bazakuba grateful kuhulumende ngoba zinengi izinto kade zihlupha laba bantu, besehluleka ukuvula amaBank Account, bebesehluleka ukuhambisa abantwbabo esikolweni, besehluleka ukuthatha amaPassport ukuthi labo bekwanise ukuziphilisa nge Cross Border trade njengabanye. So kodwa khathesi ke sekuyi move enhle. Kodwa eyenziwa ngobuhlakaniphi ukuthi yenziwe towards ama Elections esesondele ukwenzela ukuthi kube yindlela yokugola, indlela yokugola amaVoti leyo. Ngoba nga kade kunganjalo bekumele ukuthi uhulumende ukwenzile sisuka kumaElections adlulayo ngoba kade kulokho kuyingxoxo ekade beyikhuluma sonke lesi isikhathi.”

Inyathelo elithethwe nguhulumende ukusebenzisana lenkokheli yomdabu uGumbo uthi lilakho ukudala inkinga.

“Kuzaba nzima ukuthi abantu bazilethe futhi phambili laphana ngoba abala i-assurance eyokuthi ngokuletha amabizo abo sebewahambisa futhi ukuthi kuzakube kuhle kibo yini kumbe kulokunye okuzyenzakala. Abasuthisekanga abantu, abasuthiseki ngokuhanjiswa kwamabizo, akula yini eyinye into ezayenzakala kibo. Ngoba ukubathathisa amaBirth kungakabi le National Healing, uhulumende engakaphumeli egcekeni aqhube i-programme ye National Healing and Truth Telling, kuba nzima ukuthi abantu bakwamukele ukuthi akula okunye yini ukuthi isandla lesi esibuyayo, asifihlanga yini ingqamu emuva. So uhulumende bekumele ukuthi ma esenza lezi izinto, kuhambe konke, abantu bexolelane.”

Bacatshangelwa ukuba bafika phose inkulungwane ezingamatshumi amabili - 20 000 abantu abalahlekelwa yimiphefumulo ngesikhathi sombhuqazwe kusukela ngomnyaka ka 1982 kusiyafika umnyaka ka 1988.

Lesi sihluku sokubulawa kwabantu bemhlubulweni weMandebeleni laseNkabazwe saze saqedwa yikulobelanwa kwesivumelwano sokukhumisana umlotha phakathi kwamabandla athi ele Zanu lele elalikhokhelwa ngumuyi uRobert Mubgabe lele PF Zapu elalikhokhelwa ngumuyi owayesaziwa ngegama lokuthi Father Zimbabwe, uJoshua Nkomo, esebumba ibandla lomanyano eleZanu PF.

Facebook Forum

XS
SM
MD
LG