amalinks wokungena

Breaking News

Abadabuka eZimbabwe Abahlala eBotswana Abakhangelelanga Ingunquko ngo2022


FILE - Odabuka kwele Botswana uhlatshwa ijekiseni ye Oxford/AstraZeneca COVID-19 vaccine in Francistown, Botswana, March 26, 2021.

Abanye abadabuka eZimbabwe abahlala kwele Botswana bathi nomanje bethaba ukubona umnyaka ka2021 usedlula, abalathemba lokuthi kuzakubalenguquko lonyaka.

Ukuqhamuka komnyaka omutsha kukhangelelwa ukuthi kulethe amathemba empilo engcono. Kodwa ngesikhathi inengi lingena kumnyaka omutsha ka2022, abanye abadabuka eZimbabwe abahlala kwele Botswana bathi abalathemba kangako ukuthi kuzakuba lenguquko.

Inengi lithwale nzima ngomnyaka ka2021 ngenxa yomkhuhlane weCOVID-19 osulimaze imnotho phose yamazwe wonke emhlabeni jikelele.

ICOVID-19 ayidedi njengoba sekuqhamuke umkhakha omutsha oweOmicron, omemetheka ngesiphangiphangi.

Lokhu sekutshiye abanye abadabuka eZimbabwe abahlala kwele Botswana, abafana loDumezweni Ncube, besithi akulalutho olutsha abalukhangelele lonyaka ngoba impilo okwakhathesi ibanjwe yiCOVID-19.

“Angiboni kusiba lontshintsho masinya ku2022. Mhlawumbe singaqala ukubona into ziguquka kusigaba sesibili somnyaka uma umkhuhlane weCOVID-19 ungaqala ukwehla, kodwa okwakhathesi angiboni kuzantshintsha.”

Sekulanda iminyaka emIbili umkhuhlane weCOVID-19 uyiyo indaba egudwini njalo usumise inqgubela phambili kunhlangothi ezitsheyeneyo.

UMnu. Mthabisi Dube uthi umnyaka ka2022 kumele kube ngumnyaka lapho ohulumende kanye labantu, abafunda ukuthi baphile lomkhuhlane weCOVID-19, bephume lamathuba okuziphilisa phakathi kobunzima.

“Abantu sesikhale kakhulu ngeCOVID-19. Okubalulekileyo yikuthi sibone ukuthi impilo yethu iyaphambili kanjani nomanje siphakathi kobhubhane lolu. Ukakhala akusizi.”

ICOVID-19 kayimisanga kuphela amathuba emsebenzi, ezemfundo lazo kazihambi ngendlela eqondileyo, ikakhulu abakade befanele beyengena izikolo zaphezulu emazweni aphetsheya abafana loBrian Ndlovu.

“Kunengi obekumele kwenzeke ngomnyaka ka2021. Mina bekumele ngiyeqhubekisa izifundo zami eMelika kodwa ukuqhamuka njalo nje komkhuhlane weCOVID-19, sekumise amaphupho ami.”

Okube nzima kunengi elingaphandle kwelizwe yikuthi ohulumende abanengi banikeza amathuba kuzizalwane zabo kutshiya abokuza bengala okunengi abangaziphilisa ngakho.

Abanye abafana loMnu. Stanley Ncube bathi abakhangelelanga ukuthi eZimbabwe kube lenguquko kwezomnotho.

“Akula engikukhangeleleyo ngomnyaka ka2022 ngoba iZimbabwe ilungiselela ukhetho luka 2023. Uma kulokunye, kuzabanzima ngamandla ngoba khathesi amehlo akukhetho hatshi ukuntshintsha impilo kazulu. Ngakho amaphupho awokubuyela ekhaya aqhubeka etshabalala.”

EleZimbabwe laqala ukubhekana lobunzima bomnotho welizwe ngomnyaka ka2000. Izizalwane ezingaphandle kwelizwe ziqala zilethemba lokuthi umnyaka omutsha lo mhlawumbe uzaletha untshintsho. Kodwa inengi selize ligxile impande emazweni atshiyeneyo, amathemba esiya encipha ukuthi ukuqhamuka komnyaka omutsha ofana lo 2022 kungaletha inguquko.

Bakhathazekile Abadabuka eZimbabwe Abahlala eBotswana
please wait

No media source currently available

0:00 0:03:16 0:00


Facebook Forum

XS
SM
MD
LG