amalinks wokungena

Breaking News

UMthethwandaba Wakwele Botswana Uthi Kumele Iziphepheli Ezinhlanu Ezidabuka eZimbabwe Zibuyele Ekhaya Ngenkani


Dukwi Refugee Camp, Botswana

Abadabuka eZimbabwe abahlanu abaphephela kweleBotswana abakade bephanyeke emthethwandaba, udaba lwabo lokulwisa ukubuyiselwa ekhaya sebelahle ithemba, ngemva kokuba umthethwandaba waphezulu oweHigh Court, eGaborone, ulahlele khatshana udaba lwabo.

Umthethwandaba waphezulu oweHigh Court unqume ukuba iziphepheli lezi azilasikhalo esiqinileyo ukuthi udaba lwazo lulalelwe yileli dale.

Abahlanu laba babe phanyeke udaba bekhala ngokuthi bengabuyiselwa ekhaya ngoba belakho ukuhlukuluzwa nguhulumende weZANU-PF.

Abane badinga ubuphepheli eBotswana ngemva kokutshiya ibutho kweleZimbabwe ngomnyaka ka2004, kukanti owesihlanu wayelilunga leMDC.

Kodwa umthethwandaba uthi udaba lolu luphanyekwe seludlulwe yisikhathi njalo akulasitshengiso sokuthi iziphepheli zilodaba oluqinileyo okukuthi umthethwandaba ungangenqula isimo sikahulumende weBotswana.

Uhulumende weBotswana, esebenzisana loweZimbabwe kanye lenhlanganiso yeziphepheli umhlaba wonke jikelele eye UN High Commission for Refugees (iUNHCR), yanquma ukuthi isimo sesiqondile eZimbabwe ukuthi iziphepheli ziphindele ekhaya.

Inengi labuyiselwa nyakenye lekuqaleni kwawonalo umnyaka, kodwa abahlanu laba, balanda umthethwandaba bedinga ukumisa ukuthi baphindele ekhaya.

Ngemva kokuba umthethwandaba waphezulu ulahle isicelo seziphepheli, igqwetha ebelibamela umnunzana, Obonye Jonas utshele iStudio 7 ukuthi amathuba okuphumelela uma bengaphanyeka isikhalazo emthethwandaba ophezulu oweCourt of Appeal, asemalutshwana.

Lokhu sekusitsho ukuthi iziphepheli ezinhlanu lezi sezikhangele ukuthi zibuyiselwe eZimbabwe noma yisiphi isikhathi.

Omunye weziphepheli, ongafisanga ukuqanjwa ngegama uhlaba omkhulu umkhosi esithi kuzabanzima bengabuyiselwa eZimbabwe...

“Sidane kakhulu ngesahlulelo lesi. Kade singasikhangelela kumahluli owaziwayo ngezamalungelo oluntu. Mina ngahlukuluzwa kakhulu eZimbabwe kuthiwa ngifuna ukugenqula uhulumende. Angazi ukuthi kuzokwenzakalani uma ngibuyela eZimbabwe.”

Omunye owayeyisiphepheli eBotswana engakabuyiselwa eZimbabwe ekuqaleni komnyaka, uMnu. Wasu Chibi, uthi bekusobala ukuthi abanye bakhe bazakwehlulwa kudaba lolu emthethwandaba.

“Besilethemba ukuthi bazaphathiswa, kodwa kwehlule. Sakubona ukuthi kuzehlula ngoba ukuya emthethwandaba lohulumende yikuxotsha umoya. Ayisikho kwakuqala. Iziphepheli zeNambia lazo zazama kodwa kwehlula. Bekuzaba ngokwakuqala ngabe banqobile emthethwandaba.”

Uqhubeke esithi okwenzakale emthethwandaba sekutshengise ukuthi uhulumende weBotswana nguye owathatha isinqumo sokuthi iziphepheli zibuyiselwe emuva.

“Sesikwazi ukuthi abayalayo ukuthi sihlale nguhulumende weBotswana, iUNHCR yangenela phakathi. Kodwa esizibuza khona yikuthi yindaba kulabanye abaphiwa imvumo yokuhlala, kodwa abanye bayincitshwa. Into yakhona iyasixaka njalo iyasizondisa.”

Kodwa umphathintambo wezomvikela eBotswana, uMnu. Kagiso Mmusi, uthi iziphepheli zabuyiselwa ngokuthanda kwazo kungela kubanjwa ngamandla.

IBotswana njalo ithi kwaqala kwaba lophenyo olwenziwa yinhlanganiso yomanyano wamazwe womhlaba eyeUNHCR, ukuze kube lesiqiniseko sokuthi isimo eZimbabwe sesilungele ukuthi iziphepheli ziphindele.

Ngenxa yokuthi bazabuyiselwa bebanjwa ngamandla, iziphepheli ezihambise uhulumende weBotswana emthethwandaba kazisoke zithole imfanelo eyatholwa ngabanye ababuyela ngaphambhilini, bona abaphiwa okufana lemali lokudla ukuthi bayeqala kutsha impilo eZimbabwe.

Facebook Forum

XS
SM
MD
LG