amalinks wokungena

Breaking News

Kuxotshwa Ophethe Isikhundla Samapholisa Ensitha eBotswana Okuthiwa Uzonda Abantu Bokuza


FILE: Abantu abavela kwele Zimbabwe bangena eBotswana.

UMongameli Mokgweetsi Masisi wakwele Botswana usexotshe okhokhela ugatsha lwenhloli kulelolizwe, osekuthabise inengi labe Zimbabwe abathi nguye owaxotsha abokuza abanengi elizweni bengelacala.

Bathi nguye njalo obangele ukuncitshwa kwabanengi amaphepha okuhlala kanye lokusebenza elizweni.

Udaba lolu belusegudwini kwele Botswana ngoLwesithathu kulandela ukuxotshwa kokhokhela uhlangothi lukahulumende lwamapholisa ensitha olwe Directorate on Intelligence and Security Services (DISS), uMnu. Isaac Kgosi.

Ugatsha lwe DISS lufana logatsha olwesatshwa nguzulu eZimbabwe olwe Central Intelligience Organisation (CIO), njalo uKgosi wangena ngesikhathi sombuso kaMongameli Ian Khama Seretse Khama yena otshiye isikhundla ngenyanga edluleyo.

Ngaphansi kuka Kgosi, iDISS ibe isaziwa njengohlangothi olwesatshwa ngabantu bokuza.

Abanye njalo bakhala ngokuncitshwa amaphepha okuhlala lokusebenza eBotswana ngenxa yogatsha luka Kgosi, oluyilo oluphethe amandla okuhluzisisa izicelo zalezincwadi.

Isizalwane seZimbabwe esihlala eGaborone, uMnu. Dumi Dube, uthi mhlawumbe kungaba lenguquko kulandela ukuphuma kuka Kgosi esikhundleni lesi.

Uthi kuyenzakala ukuthi uMongameli Emmerson Mnangagwa engafunda okunye ngokwenziwe nguMasisi.

"Abanengi kade bemesaba ngoba esaziwa ngokuthi nguye ophethe amandla okuthi umuntu aphiwe ipermit kumbe hatshi. Kulesifundo esingafundwa yiZimbabwe ukuthi uma umuntu engathakazelelwi nguzulu kumele akhitshwe esikhundleni. Siyabona eZimbabwe abanye lokhe bekhona ezikhundleni kodwa bengafunwa nguzulu, thina sitshelwa ukuthi silohulumende omutsha."

Esinye isizalwane seZimbabwe esihlala eGaborone, uMnu. Mthabisi Ndlovu, laye uthi kumgceke ukuthi, ngokuphuma kuka Kgosi, inengi li jabule kugoqela abeZimbabwe.

“Inengi labe Zimbabwe lilesizatho sokuthi lijabule ngoba bambona ngengomuntu owaletha isinqumo sokuncitsha abantu ama permits, kungelasizatho esizwakalayo, kukanti abanye bokuza baxotshwa elizweni kungazwakali ukuthi amacala abo yini."

Ukuphuma kukaKgosi kulandela amanyathela athile athathwa ngumongameli omutsha, uMasisi yena osendleleni yokukhipha bonke abangabe bebhekane lamacala afana lokutshaphaza isikhwama sika zulu.

Kuqathaniswa lo Mongameli Mnangagwa, uMasisi usephange wathatha amanyathela masinya ezama ukulungisa okungathakazelelwa nguzulu, yena engene esikhundleni ngenyanga edluleyo.

UMnangagwa wangena ngoLwezi nyakenye, kodwa uzulu ukhala ngokuthi kulokhe kuhanjwa ngonyawo lonwabu ukulungisa okwawonakala ngesikhathi sowayengumongameli, umnunzana Robert Mugabe.

Facebook Forum

XS
SM
MD
LG