amalinks wokungena

Breaking News

Zizonde Okumangalisayo Intathelizindaba Ezivinjwe Ukuba Zisakaze eConstitutional Court Kudaba Lokhetho


Idale laphezulu elizwe eleConstitutional Court (ConCourt) lihlale ngoLwesithathu njalo intathelizindaba ezinengi azivunyelwanga ukungena edale lokusakaza.

Umsakazo weZimbabwe Broadcasting Corporation (ZBC) yiwo wodwa ophiwe leyo mvumo wasuthengisela eminye imisakazo lokho ebikuthapha edale.

Ukuqala kokwahlulelwa kodaba lokuphikiswa kokhetho kuqale izolo edale leConstitutional Court abantu abanengi emhlabeni jikelele bebukele kumabonakude womsakazo oweZBC. Isinqumo sedale leConCourt esokuvumela iZBC kuphela ukuthi ithaphe obekusenzakala kuleli dale lisolwe ngabanengi abakumsebenzi wokwethulwa kwezindaba.

Intathelizindaba ezixoxe leStudio 7 ziveze imbono ehlukeneyo mayelana lokungavunyelwa kwazo ukungena edale. Omunye wabo nguMnu. Tumeliso Makhurane umhleli wephepha le Bmetro.

“Ukunikezwa kweZBC ilungelo lokuthi lithengisele abanye yinto engahambanga kahle ngoba bekumele kunikezwe lelo lungelo iBroadcasting Authority of Zimbabwe hatshi iZBC.”

UMakhurane wengeze ethi lokhu kuveza ukubandlululwa kweminye imisakazo.

“Yindaba engacacanga kahle ngoba iveza ukubandlululwa kweminye imisakazo, kodwa imiqondo yaboJudge ingabe ibingeyokuthi kungabi lentatheli ezinengi ezigcwala eCourt.”

UNkosikazi Fortune Moyo laye oyintathelizindaba uthi kaboni ukuthi ukwaliswa kwentathelizindaba ukungena edale lemitshina yazo bekuzaletha umahluko ethi umhlaba wonke ubukhangele.

“Angiboni ukuthi bekufanele ukuthi intathelizindaba bekufanele zalelwe ukungena lemitshina yaz edala ngoba vele loludaba belukhangelwe ngumhlaba wonke.”

Intathelizindaba ebezisemthethwandaba izolo bekumele njalo zibhalisele ukufinyelela eduze lalomthethwandaba phezu kokuthi zilemvumo yokusebenza eziyiphiwa ngabekomishini elawula ukusebenza kwentathelizindaba eye Zimbabwe Media Commission.

UNkosikazi Lulu Brenda Harris uthi lokhu kuncindezela ukusebenza kwentathelizindaba njalo kuveza ukuthi intathelizindaba azikhululekanga.

“Lokhu ukuthi bekumele sidinge iaccredittation njalo eyokungena eCourt kutshengisa ukuthi uhulumende wethu kafui ukuthi intathelizindaba zisebenze zikhululekile.”

Osebenza lenhlanganiso ezikhankasela amalungelo okuthi uzulu athole ulwazi uMnu. Thomas Sithole laye uthi lokhu kuveza ukuthi idale alijwayelanga ukusebenza libhekwe ngumhlaba.

“Kuyatshengisa ukuthi idale alijwayelanga ukusebenza likhangelwe njalo idale lisalele kakhulu.”

UMnu. Iphithule Maphosa webandla leZapu uthi kusobala ukuthi bebengafuni ukuthi intathelizindaba zisabalalise obekusenzakala edale izolo.

“Kusobala ukuthi imedia ibivinjwa ukuthi ibroadcaste obekusenzakala izolo”

Inhlanganiso eye MiSA Zimbabwe izame ukuphikisa lesi sinqumo sokuvumela iZBC yodwa edale kodwa yehlulwa edale. Baphikise bethi okwenziwe ngabe Judicial Services Commission ukuvumela iZBC yodwa yokusakaza okuzabe kusenzakala yikweyisa eminye imisakazo njalo kuzaba nzima ukuthi yenelise ukuthola okuyabe kusenziwa ngabeZBC ngoba behlawulisa imali enengi ukubapha abakusakazayo.

IZBC ithe ngokuphiwa leyo mvumo yasidinga ukuhlawulisa abafuna ukuthatha abakusakazayo ukuze basakaze kweyabo imisakazo inkulungwane ezilitshumi lantathu zamadollar - $13 000 ngelanga.

XS
SM
MD
LG