Usomabhizimusi uAmkela Nyoni usenike iqembu lomdlalo wenguqu eleBulawayo City inkulungwane ezingamatshumi ayithoba minwe mbili zamadola okuyimali eyokuholisa abadlali bona ababikwa bebengazake behole lonyaka.
UNyoni uthi njengomuntu wako Bulawayo kuqakathekile ukuba aphathise lapho ayenelisa khona.
“Ngathokoza kakhulu ngokuphenduka kweqembu leBulawayo City kuPremier Soccer League ngoba kusitsho ukuba amaqembu akoBulawayo abe elokhu eyanda. Ngathola-ke ukuthi kungcono sibaphathise izandla zixhasane ukuze bengadonsi nzima bebodwa.
"Kusukela nyakenye silokhu sisahamba ndawonye njalo ngikubone kufanele ukuba ngincedise umphakathi ngoba nxa uthola kungcono ukuba ngibisele futhi emphakathini,” kutsho uNyoni.
Ekuqaleni komnyaka uNyoni uphathise iqembu leBulawayo City ngenkulungwane ezingamatshumi amane waphinda njalo walipha amabhola angamatshumi amathathu.
Iqembu leBulawayo City liphenduke kusigaba sePSL lonyaka ngemva kokuba nyakenye belidlala kusigaba seSouthern Region njengoba laligunyulwe kusigaba saphezulu ekupheleni kwesizini yomnyaka ka2018.
Leliqembu elabunjwa ngamapholisa kakhansili ngomnyaka ka2006 belisaqhuba ingxoxo lenkampani yeIngwebu Breweries ezokuthi lithole usekelo lwemali oluvela kuleyonkampani ngesikhathi kuqhamuka umkhuhlane weCOVID 19.