amalinks wokungena

Breaking News

UMnangagwa Uthi Uxoxe loBiden Emhlanganweni weClimate Change eScotland


UMongameli Emmerson Mnangagwa

UMongameli Emmerson Mnangagwa uthi inkokheli yamanye atshiyeneyo ahlangane labo emhlanganweni oweUnited Nations Climate Change Conference kwele Scotland, imthembise ukuba izasebenza kahle lelizwe leZimbabwe.

UMnangagwa wethule lokhu eScotland elungiselela ukubuyela eZimbabwe namuhla kulandela ukugcitshwa kokunye okwenzakala emhlanganweni ohlolisisa ukukudumala komkhathi emhlabeni wonke jikelele oweUnited Nations Climate Change Conference. Amazwi akhe la athatshwe yisikhulumeli sakhe uMnu. George Charamba obesebenzisa inkundla yokuxhumana eyeTwitter. Uthi kunengi akutshele abakhokhela amanye amazwe.

“Ngike ngathola isikhathi ngakhuluma lenkokheli etshiyeneyo ngokwenzakala eZimbabwe. Kubelixetsha lokuthi ngethule iqiniso. Bonke engikhulume labo betshengise ukukuthakazelela ebengikhuluma ngakho. Ngiyathaba kakhulu ukuba besixoxa sivumelela ngokumele kwenziwe.”

UMnangagwa uthi ukhulumisane njalo loMongameli Joseph Biden, uMnu. Justin Trudeau, okhokhela eleCanada labanye .

“Ngibe lethuba saxoxa ngamafitshane loBiden wakwele Melika. Ukhuthaze ukuba sixoxisane ngokwenzakala eZimbabwe. Ubize omunye obehamba laye wamtshela ukuthi alungise okumele kwenziwe sixoxe ngezijeziso zenotho lokunye. Ngiphinde njalo ngakhuluma ngamafitshane lokhokhela ilizwe leCanada uMnu. Justin Trudeau. Uthe engathuma abantu bakhe ukuze bazoxoxisana ngokuhluphayo leziphathamandla zakwele Zimbabwe. Uthe yena kasoze akwenze lokhu okwamanje.”

Kodwa akade betshengisela phandle kwendawo obekusenzelwa umhlangano lo bathi akulalutho olubambekayo oluzatholwa nguMnangagwa. UNkosazana Nontokozo Malaba Ncube, odabuka eZimbabwe ohlala eBhilithane, uthi uMnangagwa uxotshana lesithunzi sakhe.

Uphinde wenza umhlangano labosomabhizimusi esebenzisa inkundla zokuxhumana lapho abathemise ukuba kulokuthula eZimbabwe njalo balakho ukuthola imali yabo ngemfanelo kumabhizimusi agoqela ezokwenjiwayo, ezokulima lokunye. Abaphikisa uhulumende abanjengo Mnu. Panyika Karimanzira, okunhlanganiso eyeRestoration of Human Rights Zimbabwe.

Ingcwethi kwezokulima zithi kumele inkokheli yomhlaba wonke jikelele izame ngamandla wonke ukuvimba intuthu edala ukukhudumala komkhathi. UMnu. Dumisani Nyoni, okhokhela uhlangothi olubona ngezokulima eMatabeleland, uthi ukukhudumala komkhathi kuhlupha abalimi.

EleZimbabwe lithi lisimisele ukulwisana lokukhudumala komkhatho loba lihlutshwa yikuswelakala kwemali yokuqhuba inhlelo ezihambelana lalokhu.

Udaba Esilethulelwe NguGibbs Dube
please wait

No media source currently available

0:00 0:04:48 0:00


Facebook Forum

XS
SM
MD
LG