amalinks wokungena

Breaking News

IZCTU Ithi Izisebenzi Zizatshengisela Emigwaqweni Zikhonona Ngokwenzakala eZimbabwe


Izisebenzi ezihambe emkhosini wokunanza usuku lwezisebenzi olwe Workers' Day ngoLwesibili.

Uzulu wakoBulawayo umanyane labantu amhlabeni wonke jikelele ekunanzeni usuku lwezisebenzi olwe Workers’ Day.

Inhlanganiso emela izisebenzi eye Zimbabwe Congress of Trade Unions (ZCTU) ithembise izisebenzi kanye labameli benhlanganiso ezehlukeneyo ukuthi baphakathi kokuqoqa usuku lokukhalala umsebenzi elizweni lonke jikelele.

Lonyaka ukunanzwa kosuku lwezisebenzi kwenziwe phansi kwesihloko esithi ‘We are at a Cross Roads - Arise Organize Do Not Mourn’.

KoBulawayo umkhosi walel’Ilanga wenzelwe eStanley Square, lapho okubuthene abantu abavele enhlanganisweni ezehlukeneyo ezimela izisebenzi.

Ezinye zalezi inhlanganiso ebezisekhosini lo zigoqela iZimbabwe Teachers’ Association, ZCTU, PTUZ Zimbabwe Urban Councils’ Association, ekaloliwe eyeNational Railways of Zimbabwe lezinye.

Okumqoka okuphume kulumbuthano yikuthi izisebenzi azijabulanga ngeholo eliphansi eselileminyaka lingakhuphulwanga kodwa indleko ezitolo lakwezinye indawo iqonga, abanye njalo bakhalaza ngokuhlukunyezwa kwamalungelo abo njengezisebenzi ikakhulu kusenziwa nguhulumende oxotshe abongi ngesikhathi betshengisela bekhonona ngeholo eliphansi.

UMnu. Ambrose Sibindi, umgcinisihlalo weZCTU emhlubulweni weMaNdebeleni uthi amakhampani amanengi avalwa, uhulumende wathembisa ukuvula amakhampani lokunikeza uzulu imisebenzi kodwa kakwenziwanga lokho.

Unkosikazi Babra Tanyanyiwa, umgcinisihlalo we ZCTU koBulawayo njalo obemele umongameli weZCTU, uthi baphakathi kokuqoqa usuku lokukhalala umsebenzi elizweni lonke jikelele.

UNkosikazi Debra Mukasa, osebenza lenhlanganiso ezizimeleyo, uthi kumele uhulumende alungisise imithetho ezakwenza abantu abazisebenzayo basebenze lula elizweni hatshi ukuhuga abaphandle kuphela ekhaya kungalungiswanga.

Isimo somnotho elizweni esingamanga kuhle kanye lokuvalwa kwamakhampani koBulawayo kwadala ukulahlekelwa yimisebenzi kwabantu abanengi njalo ukungagcwaliswa kwezithembiso okwenziwa nguhulumende sekuzondise izisebenzi kanye lozulu wonke jikelele.

Okunye okukhulunywe yizisebenzi embuthathweni lo, yikuthi kumele uzulu enelise ukuthenga izindlu, kumele kulungisiswe iholo kanye lentengo yemphahla ezitolo, kanye lokususwa kwabakubutho enhlangothini, zikahulumende.

Udaba Esilethulelwe NguBathabile Masuku
please wait

No media source currently available

0:00 0:04:35 0:00

Facebook Forum

XS
SM
MD
LG