amalinks wokungena

Breaking News

Abantu Bathwele Nzima Ngomkhuhlane weCOVID-19


Uzulu eZimbabwe katshengiseli ukuba ulandela indlela zokuzivikela kumkhuhlane weCOVID-19 loba likhuphuka inani labatholakala belegciwane leCoronavirus elizweni.

Abantu abanengi lokhu beminyana ezilindweni zamabhasi njalo laphakathi kwamabhasi Ezupco ngenxa yokusilela kwezimota zokubathwala koBulawayo lezinye indawo.

UMnu. Ambrose Sibindi, umgcinisihlalo weBulawayo Progressive Residents Association, uthi abantu bayazihambela abakhangeli ukuthi kulomkhuhlane weCOVID.”

"Eqinisweni nxa sikhangela umumo wendlela abantu abaziphatha ngayo ngendaba yeCOVID abantu kukhanya abalandaba lamaregulations, abantu bayazihambela bengafakanga ama-mask bewafakA ngaphansi kwesilevu. Abantu isocial distancing leyi abalandaba layo lesanitizing abanye babanjwa ngenkani.

“Engxenye uhlupho olwenza abantu baphithizele yindlala. Abantu kukhanya kunzima ukuthi bahlale ezindlini, abantu bayadinga imali lapha lalaphana abanye bayazama ukuzithengisela konke lokhu sokusenza ukuthi abantu baphombukuxubana. Esingakutsho yikuthi sikhuthaze izakhamuzi zakoBulawayo ukuthi asihlonipheni okubekiweyo ngoba amanani lokhe ekhwela esiyaphezulu.”

UNkosikazi Sukoluhle Ndebele, ohlala elokitshi leNkulumane, uthi kufanele baselele abantwana.

"Lalawa amacases aqansayo lathi siyakubona, lathi amacases siyawabona ayaqansa kakhulu kodwa asilanto esingayenza lathi sinje sizwa ubuhlungu ukuthi lumkhuhlane ayisiwo wokudlala kodwa inkinga esilayo siyaphila njani nxa singatshona sizivalele endlini.

UMnu. Nkululeko Ngulube, esinye isakhamuzi sakoBulawayo, uthi abantu bangena santando edolobheni okwenza kube nzima ukuthi kukhanye ukuthi kulelockdown.

“I curfew 6 to 6 ilungile kakhulu, ilockdown layo siyayibona ukuthi ikhona kodwa koBulawayo abantu abayilandeli umuntu uyangena etown esiyawayawaya kuphela vele angiboni ukuthi bayayilandela ilockdown.”

UDokotela Mthabisi Bhebhe ukhuthaza abantu ukuthi bazivikele kumkhuhlane weCOVID-19 sonke isikhathi njalo bahlatshwe ijekiseni yokuvuselela amasotsha omzimba okulwisana legciwane leCoronavirus.

Kusenjalo uhulumende wamukele amajekiseni aweSinovac ayizigidi ezimbili – 2 million atholakale kwele China naumhla.

Besamukela amajekiseni la, umsekeli wezempilakahle, uDokotela John Mangwiro, uthe bayananzelela ukuthi inani labantu elihlatshwayo liyaqansa ngakho sebeza kwengeza indawo ezizahlatshelwa amajekiseni.

"Ukufika kwezigidi ezimbili (2million) zeVaccine kuqondile kakhulu, kuthi inkungwane ezingamakhulu amahlanu (500,000) ezafika kuviki ephelileyo zisetshenziswe zaphela masinya okwenza ukuba izigidi lezi ezimbili kuzenza ukuhlatshwa kwabantu kukhuphuke elizweni. Ijekiseni le abantu bayayamukela sithemba ukuthi amaZimbabweans azaqhubeka enjalo. Umphathintambo obona ngesikwama semali usithembise ukuthi ama Vaccine amanengi ayabuya. Sithanda ukukhuthaza uzulu ukuba aqhubekele phambili etshengisela ukwamukela kwejekiseni le."

Kusiyaphela usuku lwayizolo koBulawayo bekutholakale abantu abalikhulu lamatshumi amabili-122 abaleCOVID-19, kuthi elizweni lonke jikelele bekulabangabaphezu kwenkulungwane ezimbili-2264 abahlolwe batholakala belegcikwane leli. Ababulewe yileli gcikwane babe ngamatshumi amathathu lane – 34. Inani lasebebulewe yilumkhuhlane lokhu waqhamukayo nyakenye ngoMbimbitho selikunkulungwane eziphose zifike kwezimbili-1,974.

Sebefika inkulungwane phose azingamakhulu ayisitshiyagalolunye – 819,058 asebehlatshwe okwakuqala ijekiseni yokuzivikela kumkhuhlane lo kuthi abedlula inkulungwane ezingamakhulu amahlanu – 579,699 sebehlatshwe okwesibili.

Facebook Forum

XS
SM
MD
LG