Umuntu obekumele ahlolwe igcikwane leCoronavirus esibhedlela seWilkins eHarare izolo, kubikwa ukuthi ubalekile engakahlolwa ngodokotela.
Imibiko eyethulwe liphephandaba leHerald ebulenjini bokuxhumana obeTwitter kanye leZBC, iveza ukuthi indoda le eleminyaka engamatshumi amabili lasithupha edabuka eThailand, idle phansi sokulungiselelwa ukuthi ihlolwe kulandela ukulethwa kwakhe kulesosibhedlela etshisa umzimba, ethimula njalo ekhwehlela.
Kubikwa ukuthi usedingwa ngamapholisa. Umuntu lo, okungavezwanga igama lakhe, wathi engena eZimbabwe wabika ukuthi uzakuya ezindlini ezimbili ePomona leMount Pleasant.
Amapholisa athi katholakalanga ezindlini lezi. Isikhulumeli samapholisa uSenior Assistant Commissioner Paul Nyathi uthi bazamdinga baze bamthole.
Inkokheli yekhansili yeHarare ithi umuntu lo umangalise abezempilakahle eWilkins Hospital lapho akade emelele ukuhlolwa eloyise lezinye izihlobo ngoba ubaleke bengacabangeli ukuthi engakwenza lokhu.
Abantu besaba ukuthi ulakho ukumemethekisa igcikwane leCoronavirus nxa elalo.