amalinks wokungena

Breaking News

Abadabuka eZimbabwe Abahlala eBhilithane Badingela Abaswelayo Ukudla


Omunye wabathole ukudla eZimbabwe. (Courtesy Photo)

Izizalwane zeZimbabwe ezihlala kwele Bhilthane sezibumbe amaqembu atshiyeneyo okubuthanisa imali ukuthi zithengela ukudla abadubekayo kuzabelo abahlala kuzo kwele Zimbabwe kulandela uhlelo luka hulumende olwe lockdown ngenxa yokuqhamuka komkhuhlane oweCOVID-19 elizweni.

Inengi lezizalwane zeZimbabwe esezihlala kwele Bhilithani lithi lithinteke kakhulu ngodubo lwendlala osolubhahile ekhaya. Ngakho-ke sebephume lomcabango wokuqoqana bebuthanisa imali bethengela abantu ukudla hatshi izihlobo zabo kuphela kodwa emangweni lapho abadabuka khona.

UNkosazana Molly Vundla ngomunye osebenza labanye bakhe ekuncedeni uzulu.

"Ngesikhathi seCOVID siye sabona thina labangane bami ukuthi singancedisa kanjani abantu abadala abahluphekileyo ekhaya abaswelayo nabakhubazekileyo,so siye sancedisa izimuli koBulawayo nasemakhaya emaphandleni naseTsholotsho.Besingancedisi izihlobo zethu kodwa besincedisa labo esesibabone ukuthi banezidingo abangasakwanisi ukuzenzela noma abangana bantwana ababancedisayo."

Banikwa ukudla okudingwa ngabadabuka eZimbabwe abahlala kwele Bhilithane. (Courtesy Image)
Banikwa ukudla okudingwa ngabadabuka eZimbabwe abahlala kwele Bhilithane. (Courtesy Image)

UMnu. Lucky Moyo ngowe nhlanganiso yeNgwana Development Trust ethengele ukudla izakhamizi zeNgwana ePlumtree.

"Ngesikhathi seCOVID besithenge nje impuphu, itshukela, ama cooking oil lokuthi sizakunika abantu abadala ikakhulu abantu abadala bonke abalama 80 years and above ngoba ama border ebevaliwe abantu bakithi abajayele ukuthumeza impahla bekwele South Africa ngabafowethu laba esibabiza sithi ngomalayitsha bebengenelisi. Ngakho-ke kusuke kwenza kwabanzima ukuthi abantu bathole ukudla, so sibe sithumeza-ke izimali sicela abantu bayeku order kuma wholesale baye deliver ekhaya."

Abantu abanengi kabalamisebenzi eZimbabwe njalo abalasizo abalutholayo kuhulumende ngakho-ke uNkosazana Isabel Ndlovu uthi yikho okwenza ahlangane labanye bakhe ukuthi bancedise abantu koBulawayo.

"Baphila ngokuzisebenza es'daradeni. Sebevalelekile siphakamile ehh sabathengela impuphu ehh namaBasic things ezidingwa ngumuntu. Elokitshini laseNew Lobengula, elokitshini laseNtumbane, elokitshini laseNorth Pumula, eNkulumane, South Pumula zifinyelele lezo zamba lezandla sibonu'kuthi asizi ukuma sithi senzela Icovid-19 kuphela ngoba abadala labana bayaludinga usizo lwethu since kwelakithi kungela Welfare."

UMzondiwa Mugadza, umdlali wenguqu owaduma kakhulu esadlalela iqembu leZimbabwe Saints, Amazulu lele Zimbabwe National team elama Warriors, laye uqoqane labanye bakhe ayedlala labo inguqu ukuthi bathengele abantu ukudla.

"Mina labangane bami uEsrom Nyandoro loRichard Choruma njengabantwana sakhulela koBulawayo sahlanganisa amakhanda safaka okuncane sincediswa ngabangane lezihlobo ukuthi sizame ukuthengela abadala abeMzilikazi esezwa ukuthi kabatholi ukudla. Besithanda ukuthi angathi singakhangela ezinye indawo hatshi kuphela eMzilikazi lapho esakhulela khona."

Sokuzinyanga ezithile uhulumende weZimbabwe wethula iziqondiso zokwalela abantu ukuhambahamba esenzela ukulwisana lomkhuhlane weCoronavirus COVID-19. Inengi livalelwa nje kodwa alilakudla ngenxa yokungasebenzi.

Facebook Forum

XS
SM
MD
LG