amalinks wokungena

Breaking News

Abezimpilakahle Bakhalala Umsebenzi Ngesikhathi Likhuphuka Inani Labalomkhuhlane weCoronavirus eZimbabwe


FILE - Sebekhalala umsebenzi abongi labongikazi eZimbabwe.

Abongi labongikazi bakhalala umsebenzi eZimbabwe ngesikhathi uhulumende ebikele uzulu ngoLwesithathu ukuthi sokulomunye njalo umuntu wesithathu olomkhuhlane weCoronavirus COVID-19.

Abakhalale umsebenzi bathi kabalazembatho ezifaneleyo zokuzivikela kumkhuhlane weCoronavirus nxa bebamba abalegcikwane kumbe abalomkhuhlane lo osobulele abantu abanengi emhlabeni wonke jikelele.

Bathi kumele uhulumende abanike amagogolosi, ama masks, izembatho zamaplastiki lokunye okusetshenziswa ekuvikeleni umkhuhlane lo osobulele izizalwane zakwele Zimbabwe ezimbili.

Omele abongi labongikazi kunhlanganiso yeZimbabwe Nurses Association, uMnu. Enock Dongo, uthi besaba ukuthi bangaba lomkhuhlane lo ongelaphekiyo nxa bengasebenza bengelazembatho lokunye okufunakalayo.

Uthi bafuna ukuthi uhulumende abaholise abakubiza ngokuthi yiCOVID allowance kanye lokubadingela imali yokubagcina nxa bengabamba umkhuhlane lo besemsebenzini.

Kasenelisanga ukukhuluma ngodaba lolu lomphathintambo wezempilakahle, uDokotela Obadiah Moyo.

UMoyo usanda kubika ukuthi sokulesinye isizalwane seZimbabwe esilomkhuhlane lo. Kade bebabili abalomkhuhlane weCoronavirus abagoqela umuyi uZororo Makamba, obulewe ngumkhuhlane lo.

Abantu bakhanya sbevuse amehlo ngokumemetheka komkhuhlane lo eHarare lapho abathi bayazama ukuzivikela lobanje kumele baphande ukudla nsukuzonke.

Abanye abanjengo Nkosikazi Hilder Phiri bathi kabasagadi lamabhasi ngenxa yokwesaba ukuthelelwana komkhuhlane weCoronavirus osogulise abantu abedlula amakhulu amane lamatshumi amahlanu emhlabeni wonke jikelele – 450,000.

“Kuqakathekile ukuthi abantu bekele ukuhamba hamba ikakhulu ngesilkhathi lesi eseCoronavirus umkhuhlane lo usugcwele. Kunzima ukuthi ubone ukuthi umuntu okhulama laye ulayo loba hatshi. Abantu bengahlala phansi bengayindawo kuyanceda ukuthi bengaze bathelela abanye.”

Lokhu kusekelwe ngesinye isakhamuzi uNkosikazi Juliet Maramba yena othi yena labangane bakhe sebesebenzela endlini.

“Ukuthi abantu basebenze behlezi endlini kungcono kakhulu. Kungenza ukuthi kuvikile ukumemetheke kwe gcikwane leli ele corona. Igcikwane leli limemetheka ngokuhlangana kwabantu. Kwenza ukuba bengabi lamaathuba okuhlangana lalo.”

Izitolo ezifana labo Choppies, OK, Spar lezinye lazo sezizama ngazo zonke indlela ukwenqabela ukubuthana kwabantu abadinga impuphu engatholakaliyo.

Kodwa esinye isakhamuzi seHarare, uMnu. Matthew Khuphe, uthi kunzima ukulandela izinqumo zokuhlala ngekhaya ngenxa yomumo womnotho weZimbabwe lapho abantu abanengi abaphila ngokuzisebenza ukuze banakekele imuli.

“Kunzima ukulandela izinqumo lezi nguzulu oseZimbabwe. Okwakuqala sinanzelela ukuba abantu bayaswela izinto ezinjengokudla, bafuna ukuya ema bank befuna imali, lasemzileni ukuthenga ukudla. Lezinhlupho zenza kube nzima. Abantu abangahlali duze lemadolobheni bacina begada ama ZUPCO, abanye basebenza ukuthengisa bangahlala insuku ezinengi bengasebenzi kungaba nzima.”

UMongameli Emmerson Mnangagwa usevale imingcele yonke yelizwe esithi kasavumeli abantu abavela phandle kwelizwe kuthi abakuleli sokumele behlale emakhaya lize liphele leligcikwane.

Imbuthano enjengemitshado, izililo lamabhawa sokuvaliwe emizameni yokuvikela ukumethetheka lokuthelelanwa kwaleligcikwane.

Facebook Forum

XS
SM
MD
LG