Sekulabantu abafika phose inkulungwane ezingamakhulu amane - 394,000 asebehlatshwe okwesibili amajekiseni okuzivikela kumkhuhlane weCOVID-19.
Bathakazelela ukuba sebelendlela yokuzivikela kumkhuhlane lo lobanje belokhu besesaba ukuthi bengathapha igciwane leCOVID-19.
EleZimbabwe lathi lisungula uhlelo lokuhlaba abantu amajekiseni okuvikela uzulu kumkhuhlane weCOVID-19, lakubeka sobala ukuba kumele kuhlatshwe abantu abafika izigidi ezilitshumi – 10 million.
Okwamanje kulabantu abafika phose inkulungwane ezingamakhulu ayisikhombisa – 689,920 asebehlatshwe okwakuqala ijekiseni yokuzivikela kumkhuhlane lo elizweni. Abafika phose inkulungwane ezingamakhulu amane sebehlatshwe okwesibili amajekiseni agoqela eyeSinopharm, iSinovac lamanye.
Bayakuthakazelela kakhulu labo asebehlatshwe amajekiseni okwesibili abathi benza lokhu bekhululekile. UMnu. Victor Dube, ngomunye wasebahlatshwa lelijekiseni.
UDube uthi akaselavalo ngoba esazi ukuthi uvikelekile njengoba sewahlatshwa ijekiseni yesibili.
Omunye njalo nguMnu. Leopold Munhende, intathelizindaba esebenza izimele. Uchasisa kabanzi ukuba kungani wabona kufanele ahlatshwe ijekiseni lokuzivikela kumkhuhlane weCOVID-19.
UMunhende uthi wakhuthazwa njalo ngokwethulwa nguhulumende ukuba ahlatshwe ijekiseni yokuzivikela kugciwane leCOVID-19.
Lobanje bethokozile ababili laba labanye, odokotela bathi kukhanya uhlelo lolu lungaqhutshwa ngemfanelo.
UDokotela Tinashe Gede, ingcwethi kwezempilakahle njalo owabangomunye wabahlatshwa ekuqaleni kohlelo lukahulumande, uthi kuzakuba nzima ukuthi ilizwe leZimbabwe lifikise inani labantu okumele behlatshwe amajekiseni la.
Kunsukwana ezisanda kwedlula kuke kwaba lemibiko yokuba ebeseqalile ukusilela amajekiseni okuzivikela kulolubhubhane lweCOVID-19 kwezinye indawo kulabo akade befuna ukulihlatshwa okwakuqala.
Kodwa obona ngezokuqhutshwa kwenhlelo zokwenqabela ukumemetheka kwalolubhubhane esebenzela emawofisini kamongameli, uDokotela Agnes Mahomva, uyilandule imibiko le esithi kulezinye indawo okulabantu abanengi abayahlatshwa khona okwenza kusilele amajekiseni okuvimba ukumemetheka kwegciwane leCOVID-19 kulezondawo.
Uthi uhulumende usesusa amajekiseni endaweni okulabantu abalutshwana ayewafake endaweni okulabantu abanengi. Uhlangothi lwezempilakahle lubika ukuthi umkhuhlane weCOVID-19 usubulele abantu abedlula inkulungwane lengxenye – 1,622 eZimbabwe phakathi kwabafika inkulungwane ezingamatshumi phose amane – 39,432 asebehlolwe batholakala beleCOVID-19.
Facebook Forum